ابوراشد حبرانی سے روایت ہے، انہوں نے کہا کہ میری ملاقات رسول اللہ صلی اللہ علیہ وسلم کے شہسوار سیدنا مقداد بن اسود رضی اللہ عنہ سے ہوئی جو صرافوں کے بڑے صندوقوں میں سے ایک پر بیٹھے ہوئے تھے اور اپنی بھاری جسامت کی وجہ سے اس سے باہر نکل رہے تھے، وہ غزوے کا ارادہ رکھتے تھے، میں نے (ان کی معذوری دیکھ کر) کہا: اللہ نے آپ کو (جہاد سے پیچھے رہنے کا) عذر دے رکھا ہے، تو انہوں نے فرمایا: سورہ بحوث (یعنی سورہ توبہ) نے مجھ پر (پیچھے رہنا) گراں کر دیا ہے، اللہ عزوجل کا ارشاد ہے: ﴿انْفِرُوا خِفَافًا وَثِقَالًا﴾ ”تم نکلو خواہ تم ہلکے ہو یا بوجھل۔“ [سورة التوبة: 41] ۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ: الْجِهَادِ/حدیث: 2583]