سیدنا براء بن عازب رضی اللہ عنہ سے روایت ہے کہ ایک دیہاتی رسول اللہ صلی اللہ علیہ وسلم کی خدمت میں حاضر ہوا اور عرض کی: یا رسول اللہ! مجھے کوئی ایسا عمل سکھائیے جو مجھے جنت میں داخل کر دے، آپ صلی اللہ علیہ وسلم نے فرمایا: ”اگرچہ تم نے کلام مختصر کیا ہے لیکن سوال بہت بڑا کیا ہے: «أعتقِ النَّسَمةَ وفُكَّ الرقَبَة» ”کسی جان کو آزاد کرو اور گردن چھڑاؤ“۔“ اس نے عرض کی: کیا یہ دونوں ایک ہی چیز نہیں ہیں؟ آپ صلی اللہ علیہ وسلم نے فرمایا: ”نہیں! جان آزاد کرنے «عِتْقَ النسَمةِ» کا مطلب یہ ہے کہ تم اکیلے اسے آزاد کرنے کی ذمہ داری اٹھاؤ، جبکہ گردن چھڑانے «فَكَّ الرقَبَةِ» کا مطلب یہ ہے کہ تم اس کی قیمت کی ادائیگی میں تعاون کرو، نیز دودھ والا جانور نفع کے لیے عاریتہً دینا، اور ایسے ظالم قریبی رشتہ دار پر احسان کرنا (جو صلہ رحمی نہ کرتا ہو) بھی اس میں شامل ہے، پھر اگر تم اس کی طاقت نہ رکھو تو بھوکے کو کھانا کھلاؤ، پیاسے کو پانی پلاؤ، نیکی کا حکم دو اور برائی سے روکو، اور اگر تم اس کی بھی طاقت نہ رکھو تو اپنی زبان کو سوائے خیر کے ہر بات سے روکے رکھو۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الْمُكَاتَبِ/حدیث: 2897]