سیدنا محمد بن سیرین رضی اللہ عنہ کہتے ہیں: اس جگہ یعنی بصرہ میں ایک دفعہ سیدنا ابن عباس رضی اللہ عنہما نے کھڑے ہو کر لوگوں کو خطبہ دیا اور ان کے سامنے سورۃ البقرہ پڑھی اور اس میں جس قدر مضامین ہیں لوگوں کے سامنے بیان کیے جب آپ درج ذیل آیت پر پہنچے: اِنْ تَرَکَ خَیْرَا نِالْوَصِیَّۃُ لِلْوَالِدَیْنِ (البقرۃ: 180) ” اگر کچھ مال چھوڑے تو وصیت کر جائے اپنے ماں باپ کے لیے “۔ تو فرمایا: یہ آیت منسوخ ہو چکی ہے پھر اس کے بعد بقیہ بیان فرمایا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3120]

سیدنا ہشام بن عروہ رضی اللہ عنہ اپنے والد کا بیان نقل کرتے ہیں کہ ایک دفعہ سیدنا علی رضی اللہ عنہ ایک ہاشمی بیمار کی عیادت کے لیے تشریف لے گئے۔ اس نے وصیت کرنا چاہی لیکن سیدنا علی رضی اللہ عنہ نے اس کو منع کر دیا اور فرمایا: بے شک اللہ تعالیٰ فرماتا ہے: اِنْ تَرَکَ خَیْرَا (البقرۃ: 180) ” اگر کچھ مال چھوڑے “۔ یعنی اس آیت میں لفظ ” خیر “ سے مراد ” مال “ ہے۔ اس لیے تو اپنا مال اپنے ورثاء کے لیے چھوڑ۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3121]