سیدنا ابوسلمہ بن عبدالرحمن رضی اللہ عنہ فرماتے ہیں: سیدنا عبداللہ بن عباس رضی اللہ عنہما بیان کیا کرتے تھے کہ سیدنا ابوبکر صدیق رضی اللہ عنہ مسجد (نبوی) میں آئے تو سیدنا عمر بن خطاب رضی اللہ عنہ لوگوں سے (حضور کی وفات کے متعلق) گفتگو کر رہے تھے، آپ اس مکان میں آئے جہاں رسول پاک صلی اللہ علیہ وسلم نے وفات پائی تھی۔ حضور صلی اللہ علیہ وسلم کا چہرۂ اطہر کپڑے سے ڈھکا ہوا تھا۔ آپ نے حضؤر صلی اللہ علیہ وسلم کے چہرے سے کپڑا ہٹایا، آپ صلی اللہ علیہ وسلم کی زیارت کی اور چہرے کا بوسہ لینے کے لیے جھکے اور بولے: خدا کی قسم! اللہ تعالیٰ آپ صلی اللہ علیہ وسلم پر دو موتیں جمع نہیں کرے گا، اس موت کے بعد آپ کو کبھی موت نہیں آئے گی۔ پھر آپ مسجد میں آ گئے اور سیدنا عمر رضی اللہ عنہ ابھی تک لوگوں سے محوکلام تھے۔ سیدنا ابوبکر رضی اللہ عنہ نے کہا: اے عمر! بیٹھ جاؤ لیکن سیدنا عمر رضی اللہ عنہ نے بیٹھنے سے انکار کر دیا۔ سیدنا ابوبکر رضی اللہ عنہ نے دو تین مرتبہ بیٹھنے کو کہا لیکن سیدنا عمر رضی اللہ عنہ مسلسل انکار کرتے رہے۔ پھر سیدنا ابوبکر رضی اللہ عنہ خود کھڑے ہوئے، اللہ تعالیٰ کی حمد و ثناء کی پھر فرمایا: امام بعد! جو شخص محمد صلی اللہ علیہ وسلم کی عبادت کیا کرتا تھا تو بے شک محمد صلی اللہ علیہ وسلم فوت ہو چکے ہیں اور جو اللہ تعالیٰ کی عبادت کرتا تھا تو بے شک اللہ تعالیٰ زندہ ہے جس کو موت نہیں ہے پھر آپ نے یہ آیت تلاوت کی: (وَمَا جَعَلْنَا لِبَشَرٍ مِّنْ قَبْلِکَ الْخُلْدَ) (الانبیاء: 34) ” اور ہم نے تم سے پہلے کسی آدمی کے لیے دنیا میں ہمیشگی نہ بنائی “۔ (، م) (وَمَا مُحَمَّدٌ اِلَّا رَسُوْلٌ قَدْ خَلَتْ مِنْ قَبْلِہِ الرُّسُلُ) (آل عمران: 144) ” اور محمد تو ایک رسول ہیں ان سے پہلے اور رسول ہو چکے “۔ (، م) ” للشاکرین “ تک تلاوت کی۔ جب سیدنا ابوبکر رضی اللہ عنہ نے یہ آیات پڑھیں تو لوگوں کو رسول اللہ صلی اللہ علیہ وسلم کی وفات کا یقین ہو گیا یہاں تک کہ لوگوں کو اس آیت کے نزول کا سیدنا ابوبکر رضی اللہ عنہ کی اس دن کی تلاوت سے پتہ چلا۔ امام زہری رحمۃ اللہ علیہم کہتے ہیں: مجھے سعید بن المسیب رضی اللہ عنہما نے سیدنا عمر رضی اللہ عنہ کا یہ بیان بتایا کہ: جب سیدنا ابوبکر رضی اللہ عنہ نے ان آیات کی تلاوت کی تو میرے جسم میں لرزہ طاری ہو گیا اور میں زمین پر گر پڑا اور مجھے یقین ہو گیا کہ بے شک رسول اللہ صلی اللہ علیہ وسلم وفات پا چکے ہیں۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے ان الفاظ کے ہمراہ نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3200]