سیدنا (عبداللہ) بن عمر رضی اللہ عنہما فرماتے ہیں: اللہ تعالیٰ نے چار چیزیں اپنے ہاتھ سے پیدا کی ہیں: (1) عرش۔ (2) جنات عدن۔ (3) آدم۔ (4) قلم۔ اور مخلوقات سے چار چیزوں کے ذریعے چھپا ہوا ہے: (1) آگ۔ (2) اندھیرا۔ (3) روشنی۔ (4) تاریکی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3283]

سیدنا عبداللہ بن عباس رضی اللہ عنہما فرماتے ہیں: سیدنا آدم علیہ السلام اور سیدنا حوّا علیہا السلام کا لباس ناخنوں کی طرح ہوتا تھا جب انہوں نے شجر ممنوعہ چکھ لیا تو وہ اپنے بدن پر جنت کے (درختوں کے) پتے چپکانے لگے (راوی) فرماتے ہیں: وہ زیتون کے درخت کے پتے تھے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3284]

سیدنا عبداللہ بن عباس رضی اللہ عنہما فرماتے ہیں: زمانہ جاہلیت میں ایک عورت صرف اپنی شرمگاہ پر ایک چھوٹا سا کپڑا لپیٹے، ننگی بیت اللہ کا طواف کر رہی تھی اور کہہ رہی تھی ” آج سارا جسم یا اس کا کچھ حصہ ظاہر ہو گا، پس اس کا جو حصہ ظاہر ہو میں اس کو حلال نہیں سمجھوں گی۔ تو یہ آیت اسی کے متعلق نازل ہوئی: قُلْ مَنْ حَرَّمَ زِیْنَۃَ اللّٰہِ (الاعراف: 32) ” تم فرماؤ کس نے حرام کی اللہ کی زینت “۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3285]

سیدنا حذیفہ رضی اللہ عنہ فرماتے ہیں: اصحاب الاعراف وہ لوگ ہیں کہ نیکیوں نے ان کو دوزخ سے تو بچا لیا مگر گناہوں کی وجہ سے وہ جنت میں نہ جا سکے، جب وہ دوزخیوں کی طرف دیکھیں گے تو کہیں گے: اے ہمارے رب ہمیں ظالم قوم کے ہمراہ نہ کرنا، وہ اسی حالت میں رہیں گے حتیٰ کہ ان کا رب ان سے فرمائے گا: تم جنت میں چلے جاؤ بے شک میں نے تمہیں بخش دیا ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3286]

سیدنا جابر بن عبداللہ رضی اللہ عنہ فرماتے ہیں: جب نبی اکرم صلی اللہ علیہ وسلم حجراسود کے پاس سے گزرے تو فرمایا: نشانیوں کا سوال مت کیا کرو۔ سیدنا صالح رضی اللہ عنہ کی قوم نے اس کا سوال کیا تھا، وہ ایک اونٹنی تھی جو پہاڑ کے ایک راستے سے داخل ہوتی اور دوسرے سے نکل آتی، انہوں نے اپنے رب کے حکم کی نافرمانی کی اور اس اونٹنی کو مار ڈالا۔ اللہ تعالیٰ نے (اس نافرمانی کی پاداش میں) آسمان کے نیچے بسنے والے ہر شخص کو ہلاک کر دیا، سوائے ایک آدمی کے جو کہ اللہ تعالیٰ کے حرم میں تھا، آپ سے پوچھا گیا: وہ کون تھے؟ آپ صلی اللہ علیہ وسلم نے فرمایا: ابورغال۔ جب وہ حرم سے باہر نکلا تو اس کو بھی وہی عذاب آ گیا جو اس کی قوم کو آیا تھا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3287]