سیدنا عمر رضی اللہ عنہ اللہ تعالیٰ کے ارشاد: (فَقَاتِلُوْآ اَئِمَّۃَ الْکُفْرِ) (التوبۃ: 12) ” تو کفر کے سرغنوں سے لڑو بے شک ان کی قسمیں کچھ نہیں اس امید پر کہ شاید وہ باز آئیں “ کے متعلق فرماتے ہیں: (اَئمہ کفر سے مراد) ابوجہل بن ہشام، امیہ بن خلف، عتبہ بن ربیعہ، ابوسفیان بن حرب اور سہل بن عمرو ہیں اور یہ وہ لوگ ہیں جنہوں نے اللہ تعالیٰ کا عہد توڑا اور رسول اللہ صلی اللہ علیہ وسلم کو مکہ سے نکالنے کی سازشیں کیں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3318]

سیدنا ابوسعید خدری رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جب تم کسی کو دیکھو کہ اس نے مسجد کو لازم پکڑا ہوا ہے تو اس کو اس بات پر مجبور مت کرو کہ وہ اپنے مومن ہونے کی گواہی دے، بے شک اللہ تعالیٰ نے ارشاد فرمایا ہے: اِنَّمَا یَعْمُرُ مَسٰجِدَ اللّٰہِ مَنْ ٰامَنَ بِاللّٰہِ (التوبۃ: 18) ” اللہ کی مسجدیں وہی آباد کرتے ہیں جو اللہ اور قیامت پر ایمان لاتے “ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3319]