سیدنا ابوسعید خدری رضی اللہ عنہ فرماتے ہیں: رسول اللہ صلی اللہ علیہ وسلم نے اس آیت کی تلاوت کی: فَخَلَفَ مِنْ بَعْدِھِمْ خَلْفٌ (مریم: 59) ” تو ان کے بعد ان کی جگہ وہ نا خلف آئے “۔ پھر آپ صلی اللہ علیہ وسلم نے فرمایا: ساٹھ سالوں کے بعد ناخلف شروع ہو جائیں گے، وہ نمازوں کو ضائع کریں گے اور اپنی خواہشوں کے پیچھے چلیں گے۔ عنقریب وہ دوزخ میں ” غی “ کا جنگل پائیں گے۔ پھر ان کے بعد مزید ناخلف آئیں گے، یہ قرآن کی تلاوت تو کریں گے لیکن قرآن ان کے حلق سے نیچے نہیں اترے گا اور قرآن پاک پڑھنے والے تین طرح کے لوگ ہیں: (1) مومن۔ (2) منافق۔ (3) فاجر۔ سیدنا بشیر کا کہنا ہے: میں نے سیدنا ولید سے پوچھا: وہ تین لوگ کون کون سے ہیں؟ انہوں نے کہا: (1) منافق، کافر ہے۔ (2) فاجر، ایمان کو کھوکھلا کرتا ہے۔ (3) مومن، اس پر ایمان رکھتا ہے۔ ٭٭ یہ حدیث صحیح ہے لیکن شیخین رحمۃ اللہ علیہما نے اس کو نقل نہیں کیا۔ اس کے تمام راوی حجازی اور شامی ہیں۔ [المستدرك على الصحيحين/كِتَابُ التَّفْسِيرِ/حدیث: 3456]