سیدنا ابوالدرداء رضی اللہ عنہ سے مروی ہے کہ رسول اللہ صلی اللہ علیہ وسلم نے ارشاد فرمایا: سیدنا داؤد علیہ السلام نے عرض کی: اے میرے رب! میں تجھ سے تیری محبت اور تیرے محبین کی محبت اور ایسے عمل کی توفیق کا سوال کرتا ہوں جو مجھے تیری محبت تک پہنچا دے۔ یا اللہ! اپنی محبت کو مجھے، میری جان اور میرے اہل اور ٹھنڈے پانی سے زیادہ محبوب کر دے اور نبی اکرم صلی اللہ علیہ وسلم جب کبھی سیدنا داؤد علیہ السلام کا تذکرہ کرتے یا ان کے بارے میں کوئی واقعہ سناتے تو فرماتے: داؤد علیہ السلام سب سے زیادہ عبادت گزار تھے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3663]

سیدنا عبداللہ ابن عباس رضی اللہ عنہما فرماتے ہیں: سیدنا داؤد علیہ السلام ہفتہ کے دن اچانک انتقال فرما گئے۔ آپ ہفتہ کا دن منایا کرتے تھے، پرندے آ کر آپ پر سایہ کیا کرتے تھے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3664]

سیدنا عبداللہ بن عباس رضی اللہ عنہما اللہ تعالیٰ کے ارشاد: وَ اَلْقَیْنَا عَلٰی کُرْسِیِّہٖ جَسَدًا (ص: 34) ” اور اس کے تخت پر ایک بے جان بدن ڈال دیا۔“ کے متعلق فرماتے ہیں: وہ شیطان تھا جو ان کی کرسی پر براجمان تھا، وہ چالیس دن تک لوگوں کے فیصلے کرتا رہا۔ سیدنا سلیمان علیہ السلام کی ایک لونڈی تھی جس کا نام ” جرادہ “ تھا۔ اس جرادہ کے خاندان اور ان کی قوم میں جھگڑا تھا۔ انہوں نے ان میں برحق فیصلہ کر دیا تاہم وہ یہ خواہش رکھتے تھے کہ حق ” جرادہ “ کے خاندان کی طرف ہو۔ تو اللہ تعالیٰ کی طرف سے ان کو وحی کی گئی کہ عنقریب ان کو ایک آزمائش میں ڈالا جائے گا تو ان کو یہ معلوم نہ تھا کہ یہ آزمائش آسمانی ہو گی یا زمینی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3665]