سیدنا عقبہ بن عامر جہنی رضی اللہ عنہ سے روایت ہے کہ رسول اللہ صلی اللہ علیہ وسلم نے یہ آیات تلاوت فرمائیں: ﴿إِنَّ الَّذِينَ كَفَرُوا بِالذِّكْرِ لَمَّا جَاءَهُمْ وَإِنَّهُ لَكِتَابٌ عَزِيزٌ (41) لَا يَأْتِيهِ الْبَاطِلُ مِنْ بَيْنِ يَدَيْهِ وَلَا مِنْ خَلْفِهِ تَنْزِيلٌ مِنْ حَكِيمٍ حَمِيدٍ﴾ ”بے شک جن لوگوں نے اس نصیحت (قرآن) کا انکار کیا جب وہ ان کے پاس آئی، اور یقیناً یہ ایک نہایت معزز کتاب ہے، جس کے پاس باطل نہ اس کے سامنے سے آ سکتا ہے اور نہ ہی اس کے پیچھے سے، یہ کمال حکمت والے، سب تعریفوں کے لائق (اللہ) کی طرف سے نازل کردہ ہے۔“ [سورة فصلت: 41، 42] پھر رسول اللہ صلی اللہ علیہ وسلم نے فرمایا: ”تم اللہ کی طرف کسی ایسی چیز کے ساتھ نہیں پلٹو گے جو اس کے نزدیک اس چیز سے زیادہ محبوب ہو جو خود اسی سے نکلی ہے“ یعنی قرآن مجید۔ (مراد یہ ہے کہ اللہ تعالیٰ کے نزدیک قرآن سے زیادہ محبوب اور افضل کوئی چیز نہیں، کیونکہ یہ اللہ کی طرف سے نازل ہوئی ہے۔)
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3692]

فروہ بن نوفل اشجعی سے روایت ہے، انہوں نے کہا: میں سیدنا خباب بن ارت رضی اللہ عنہ کا پڑوسی تھا، ایک مرتبہ ہم مسجد سے باہر نکلے تو انہوں نے میرا ہاتھ پکڑ کر فرمایا: اے میرے دوست! جس قدر ہو سکے اللہ کا قرب حاصل کرو، کیونکہ تم اللہ کا قرب کسی ایسی چیز کے ذریعے حاصل نہیں کر سکتے جو اس کے کلام (قرآن) سے زیادہ اسے محبوب ہو۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3693]