سیدنا سلیمان بن صرد فرماتے ہیں: نبی اکرم صلی اللہ علیہ وسلم کے قریب دو آدمیوں میں تو تکار ہو گئی، ان میں سے ایک تو بہت ہی شدید غصہ میں آ گیا۔ نبی اکرم صلی اللہ علیہ وسلم نے فرمایا: میں ایک ایسا کلمہ جانتا ہوں کہ اگر یہ اس کو پڑھ لے تو اس کا غصہ ٹھنڈا ہو جائے (وہ کلمہ یہ ہے) اَعُوْذُ بِاللّٰہِ مِنَ الشَّیْطٰنِ الرَّجِیْم اس شخص نے کہا: کیا آپ مجھے جنون زدہ سمجھ رہے ہیں؟ تو رسول اللہ صلی اللہ علیہ وسلم نے یہ آیت پڑھی: وَإِمَّا يَنْزَغَنَّكَ مِنَ الشَّيْطَانِ نَزْغٌ فَاسْتَعِذْ بِاللَّهِ إِنَّهُ هُوَ السَّمِيعُ الْعَلِيمُ) (حم السجدۃ: 36) ” اور اگر تجھے شیطان کا کوئی کونچا (تکلیف) پہنچے تو اللہ کی پناہ مانگ بیشک وہی سنتا جانتا ہے۔“ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3690]

سیدنا سعید بن جبیر رضی اللہ عنہ روایت کرتے ہیں کہ سیدنا عبداللہ بن عباس رضی اللہ عنہما حم السجدہ کی آخری دو آیتوں پر سجدہ کرتے تھے اور ابوعبدالرحمن رضی اللہ عنہ یعنی ابن مسعود رضی اللہ عنہ ان دونوں سے پہلی آیت پر سجدہ کیا کرتے تھے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3691]