سیدنا سلیمان بن صرد رضی اللہ عنہ سے روایت ہے کہ نبی کریم صلی اللہ علیہ وسلم کے پاس دو آدمیوں نے آپس میں گالی گلوچ کی، ان میں سے ایک کا غصہ بہت بڑھ گیا، تو نبی کریم صلی اللہ علیہ وسلم نے فرمایا: ”میں ایک ایسا کلمہ جانتا ہوں کہ اگر یہ اسے کہہ لے تو اس کا غصہ دور ہو جائے گا، (وہ کلمہ یہ ہے): «أَعُوذُ بِاللَّهِ مِنَ الشَّيْطَانِ الرَّجِيمِ» ”میں اللہ کی پناہ مانگتا ہوں شیطان مردود سے“۔ اس شخص نے (غصے میں) کہا: کیا تم مجھے مجنون سمجھتے ہو؟ تو رسول اللہ صلی اللہ علیہ وسلم نے یہ آیت تلاوت فرمائی: ﴿وَإِمَّا يَنْزَغَنَّكَ مِنَ الشَّيْطَانِ نَزْغٌ فَاسْتَعِذْ بِاللَّهِ﴾ ”اور اگر شیطان کی طرف سے کوئی وسوسہ ابھارے تو اللہ کی پناہ مانگو۔“ [سورة فصلت: 36]
یہ حدیث صحیح الاسناد ہے۔ [المستدرك على الصحيحين/كِتَابُ التَّفْسِيرِ/حدیث: 3690]

سیدنا عبداللہ بن عباس رضی اللہ عنہما سے روایت ہے کہ وہ سورت حم السجدہ کی آخری دو آیات پر سجدہ کیا کرتے تھے، جبکہ سیدنا عبداللہ بن مسعود رضی اللہ عنہ ان میں سے پہلی آیت پر سجدہ کرتے تھے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3691]