سیدنا عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جب مجھے معراج کرائی گئی تو میرے پاس سے ایک پاکیزہ خوشبو گزری، میں نے پوچھا: یہ کیسی خوشبو ہے؟ فرشتوں نے بتایا: یہ فرعون کی بیٹی کی کنگھی کرنے والی ( «ماشطه») اور اس کے بچوں کی خوشبو ہے، (واقعہ یہ ہے کہ) وہ کنگھی کر رہی تھی کہ اس کے ہاتھ سے کنگھی گر گئی تو اس نے کہا: «بِاسْمِ اللَّهِ» ”اللہ کے نام سے،“ فرعون کی بیٹی نے پوچھا: کیا میرا باپ (مراد ہے)؟ اس نے کہا: نہیں، بلکہ میرا اور تیرا اور تیرے باپ کا رب اللہ ہے، بیٹی نے کہا: کیا میں یہ بات اپنے باپ کو بتا دوں؟ اس نے کہا: ہاں، چنانچہ اس نے بتا دیا، فرعون نے اسے اور اس کے بچوں کو بلایا، اس نے (فرعون سے) کہا: میری تجھ سے ایک حاجت ہے، اس نے پوچھا: کیا؟ اس نے کہا: میری اور میرے بچوں کی ہڈیاں ایک جگہ جمع کر کے دفن کرنا، فرعون نے کہا: یہ تمہارا ہم پر حق ہے، پھر اس کے بچوں کو لایا گیا اور ایک ایک کر کے (تیل کے کڑھاؤ میں) ڈالا جانے لگا، یہاں تک کہ اس کا آخری بچہ رہ گیا جو ابھی شیر خوار تھا، تو وہ بچہ بول اٹھا: اے ماں! صبر کر، بے شک تو حق پر ہے، پھر اسے بھی اس کے بچے سمیت ڈال دیا گیا۔“ رسول اللہ صلی اللہ علیہ وسلم نے فرمایا: ”چار بچوں نے شیر خوارگی میں کلام کیا: ایک یہ بچہ، دوسرا یوسف علیہ السلام کا گواہ، تیسرا جریج (عابد) کا صاحبزادہ، اور چوتھے عیسیٰ بن مریم علیہ السلام۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3877]