ام المومنین سیدہ عائشہ رضی اللہ عنہا سے مروی ہے کہ اونٹنی پر سوار حالت میں جب رسول اللہ صلی اللہ علیہ وسلم پر وحی نازل ہوتی تو اونٹنی اپنی گردن جھکا لیتی اور پھر وہ ہل بھی نہ سکتی تھی۔ پھر ام المومنین رضی اللہ عنہا نے یہ آیت پڑھی: اِنَّا سَنُلْقِیْ عَلَیْکَ قَوْلًا ثَقِیْلًا (المزمل: 5) ” بیشک ہم عنقریب تم پر ایک بھاری بات ڈالیں گے۔“ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3907]

سیدنا عبداللہ ”اِنَّ نَاشِئَۃَ الَّیْلِ“ کے بارے میں فرماتے ہیں: حبشی زبان میں اس کا مطلب ” رات کی عبادت “ ہے۔ [المستدرك على الصحيحين/كِتَابُ التَّفْسِيرِ/حدیث: 3908]

سیدنا عبداللہ بن عباس رضی اللہ عنہما ”طَعَامًا ذَا غُصَّۃٍ“ (گلے میں پھنستا کھانا) کے بارے میں فرماتے ہیں: وہ کانٹا ہے جو حلق میں پھنس جاتا ہے، نہ آگے گزرتا ہے، نہ باہر نکلتا ہے اور اللہ تعالیٰ کے ارشاد ”کَثِیْبًا مَّھِیْلًا“ (ریت کا ٹیلا بہتا ہوا) کے بارے میں فرماتے ہیں: مہیل ایسی چیز کو کہتے ہیں جس سے تھوڑی سی لیں تو تمام کی تمام بہہ جائے اور ” الْکَثِیْبُ “ ریت کے ٹیلے کو کہتے ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3909]