سیدنا عبداللہ بن عباس رضی اللہ عنہما، اللہ تعالیٰ کے ارشاد: إِنَّا أَنْزَلْنَاهُ فِي لَيْلَةِ الْقَدْرِ کے متعلق فرماتے ہیں: قرآن پاک شب قدر میں آسمان دنیا پر یکبارگی اتارا گیا جو کہ ستاروں کے مقام پر تھا پھر اللہ تعالیٰ نے وہاں سے رسول اللہ صلی اللہ علیہ وسلم پر وقتاً فوقتاً نازل فرمایا۔ اللہ تعالیٰ نے فرمایا: وَ قَالَ الَّذِیْنَ کَفَرُوْا لَوْ لَا نُزِّلَ عَلَیْہِ الْقُرْاٰنُ جُمْلَۃً وَّاحِدَۃً کَذٰلِکَ لِنُثَبِّتَ بِہٖ فُؤَادَکَ وَ رَتَّلْنٰہُ تَرْتِیْلًا (الفرقان: 32) ” اور کافر بولے قرآن ان پر ایک ساتھ کیوں نہ اتار دیا ہم نے یونہی بتدریج اسے اتارا ہے کہ اس سے تمہارا دل مضبوط کریں اور ہم نے اسے ٹھہر ٹھہر کر پڑھا۔“ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 4002]

سیدنا عبداللہ بن عباس رضی اللہ عنہما فرماتے ہیں: قرآن کریم شب قدر میں سب سے اوپر والے آسمان سے آسمان دنیا پر یکبارگی نازل ہوا پھر (وہاں سے) کئی سالوں میں نازل ہوا اور آپ نے اس آیت کی تلاوت کی: فَلَآ اُقْسِمُ بِمَوٰقِعِ النُّجُوْمِ وَ اِنَّہٗ لَقَسَمٌ لَّوْ تَعْلَمُوْنَ عَظِیْمٌ) (الواقعۃ: 75، 76) ” تو مجھے ان جگہوں کی قسم ہے جہاں تارے ڈوبتے ہیں، اور تم سمجھو تو یہ بہت بڑی قسم ہے “ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 4003]