سیدنا مرثد کا بیان ہے کہ میں نے سیدنا ابوذر رضی اللہ عنہ سے پوچھا: کیا تم نے رسول اللہ صلی اللہ علیہ وسلم کو کبھی شب قدر کا تذکرہ کرتے سنا؟ انہوں نے کہا: جی ہاں۔ میں نے (ایک دفعہ) عرض کی: یا رسول اللہ صلی اللہ علیہ وسلم آپ مجھے شب قدر کے متعلق بتائیے کہ یہ رمضان المبارک میں ہوتی ہے یا غیر رمضان میں؟ آپ نے فرمایا: رمضان المبارک میں۔ میں نے کہا: یا رسول اللہ صلی اللہ علیہ وسلم ! یہ صرف انبیاء کرام کی ظاہری حیات تک ہی ہوتی ہے اور نبی کی وفات کے ساتھ اس کو بھی اٹھا لیا جاتا ہے، یا قیامت تک کے لئے ہے؟ آپ نے فرمایا: نہیں بلکہ یہ سلسلہ قیامت تک قائم رہے گا۔ میں نے کہا: یا رسول اللہ صلی اللہ علیہ وسلم ! یہ رمضان المبارک کے کن ایام میں ہوتی ہے؟ آپ نے فرمایا: آخری عشرہ میں اور اب اس کے بعد اس سلسلہ میں مجھ سے کوئی سوال مت کرنا۔ میں نے کہا: یا رسول اللہ صلی اللہ علیہ وسلم ! میں آپ کو اپنے اس حق کی قسم دیتا ہوں جو آپ پر ہے۔ آخری عشرے کے کس دن میں ہوتی ہے؟ (ابوذر رضی اللہ عنہ) فرماتے ہیں: اس بات پر رسول اللہ صلی اللہ علیہ وسلم مجھ پر اس قدر شدید ناراض ہوئے کہ اس سے پہلے کبھی اتنے ناراض نہیں ہوئے تھے اور آپ نے فرمایا: اگر اللہ تعالیٰ چاہتا تو تمہیں اس کی بھی اطلاع دے دیتا اس کو آخری سات راتوں میں تلاش کرو، اس کے بعد اب مجھ سے کوئی سوال مت کرنا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 4004]