سیدنا عبداللہ بن عباس رضی اللہ عنہما فرماتے ہیں: قریش نے یہود سے کہا: ہمیں کوئی ایسی چیز بتاؤ جس کے بارے میں ہم اس آدمی (محمد صلی اللہ علیہ وسلم ) سے سوال کریں۔ انہوں نے کہا: اس سے روح کے متعلق پوچھو! تب یہ آیت نازل ہوئی: وَ یَسْئَلُوْنَکَ عَنِ الرُّوْحِ قُلِ الرُّوْحُ مِنْ اَمْرِ رَبِّیْ وَ مَآ اُوْتِیْتُمْ مِّنَ الْعِلْمِ اِلَّا قَلِیْلًا (الاسراء: 85) ” اور تم سے روح کو پوچھتے ہیں، تم فرماؤ روح میرے رب کے حکم سے ایک چیز ہے اور تمہیں علم نہ ملا مگر تھوڑا۔“ انہوں نے کہا: ہمیں تھوڑا علم ملا ہے جبکہ ہمیں تورات دی گئی، جس میں اللہ کا حکم موجود ہے اور جس کو تورات دی گئی اس کو خیر کثیر دیا گیا۔ آپ فرماتے ہیں تب یہ آیت نازل ہوئی: قُلْ لَّوْ کَانَ الْبَحْرُ مِدَادًا لِّکَلِمٰتِ رَبِّیْ لَنَفِدَ الْبَحْرُ قَبْلَ اَنْ تَنْفَدَ کَلِمٰتُ رَبِّیْ وَ لَوْ جِئْنَا بِمِثْلِہٖ مَدَدًا (الکہف: 109) ” تم فرما دو اگر سمندر میرے رب کی باتوں کے لیے سیاہی ہو تو ضرور سمندر ختم ہو جائے گا اور میرے رب کی باتیں ختم نہ ہوں گی اگرچہ ہم ویسا ہی اور اس کی مدد کو لے آئیں۔“ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 4005]