اس سورت کے فصائل ” فضائل القرآن “ کے باب میں ذکر کئے جا چکے ہیں۔ ٭٭ سیدنا ابی بن کعب رضی اللہ عنہ فرماتے ہیں: مشرکین نے کہا: اے محمد! اپنے رب کا نسب بیان کرو تو اللہ تعالیٰ نے یہ سورت نازل فرمائی: قُلْ ھُوَ اللّٰہُ اَحَدٌ اَللّٰہُ الصَّمَدُ لَمْ یَلِدْ وَ لَمْ یُوْلَدْ وَ لَمْ یَکُنْ لَّہٗ کُفُوًا اَحَدٌ ” تم فرماؤ وہ اللہ ہے وہ ایک ہے، اللہ بے نیاز ہے، نہ اس کی کوئی اولاد اور نہ وہ کسی سے پیدا ہوا، اور نہ اس کے جوڑ کا کوئی۔“ ” الصَّمَدُ “ (آپ فرماتے ہیں ” الصمد “ وہ ہوتا ہے جس کی اولاد نہ ہو) ” لَمْ یَلِدْ وَ لَمْ یُوْلَدْ “ کیونکہ جو بھی پیدا ہو گا، وہ مرے گا اور جو مرے گا، اس کی وراثت بھی بٹے گی اور اللہ تعالیٰ (نہ پیدا ہوا ہے) نہ مرے گا، نہ اس کی وراثت بٹے گی۔ ” وَ لَمْ یَکُنْ لَّہٗ کُفُوًا اَحَدٌ “ آپ فرماتے ہیں: نہ اس سے کسی کی مشابہت ہے، نہ اس کے کوئی برابر ہے اور نہ ہی اس کی مثل کوئی چیز ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 4031]