سیدنا عبداللہ بن عباس رضی اللہ عنہما سے روایت ہے، انہوں نے کہا کہ میں سیدنا عمر رضی اللہ عنہ کی خدمت میں اس وقت حاضر ہوا جب وہ زخمی تھے، تو میں نے عرض کیا: ”اے امیر المؤمنین! آپ کو جنت کی بشارت ہو، آپ اس وقت ایمان لائے جب لوگ کفر کر رہے تھے، آپ نے رسول اللہ صلی اللہ علیہ وسلم کے ساتھ مل کر اس وقت جہاد کیا جب لوگوں نے آپ صلی اللہ علیہ وسلم کا ساتھ چھوڑ دیا تھا، پھر رسول اللہ صلی اللہ علیہ وسلم کی وفات اس حال میں ہوئی کہ وہ آپ سے راضی تھے، آپ کی خلافت پر دو بندوں نے بھی اختلاف نہیں کیا اور اب آپ کو شہادت نصیب ہو رہی ہے۔“ انہوں نے فرمایا: ”اپنی بات دوبارہ دہراؤ“، تو میں نے وہ باتیں دوبارہ دہرائیں۔ تب انہوں نے فرمایا: ”اللہ کی قسم! جس کے سوا کوئی سچا معبود نہیں، اگر میرے پاس روئے زمین کا تمام سونا اور چاندی ہو تو میں اسے اس ہولناکی سے بچنے کے لیے بطور فدیہ دے دوں جو سامنے آنے والی ہے (یعنی موت اور مابعد کے مراحل)۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4565]