سیدنا ابوسلمہ اور یحییٰ بن عبد الرحمن بن حاطب وغیرہ سے روایت ہے کہ جب سیدنا عمر بن خطاب رضی اللہ عنہ کو زخمی کیا گیا تو انہوں نے اپنے صاحبزادے عبد اللہ رضی اللہ عنہ سے فرمایا: ”عائشہ رضی اللہ عنہا کے پاس جاؤ اور انہیں میرا سلام کہو، اور کہو کہ عمر کہتا ہے کہ اگر آپ کو اس سے کوئی تکلیف نہ ہو اور جگہ کی تنگی محسوس نہ ہو تو میری خواہش ہے کہ مجھے میرے دونوں ساتھیوں (رسول اللہ صلی اللہ علیہ وسلم اور ابوبکر صدیق) کے پہلو میں دفن کیا جائے، اور اگر اس سے آپ کو تکلیف ہو یا تنگی محسوس ہو تو میری زندگی کی قسم! اس بقیع میں رسول اللہ صلی اللہ علیہ وسلم کے وہ اصحاب اور امہات المؤمنین دفن ہیں جو عمر سے بہتر ہیں“، پس جب قاصد ان کے پاس پہنچا تو انہوں نے فرمایا: ”بے شک اس سے مجھے کوئی تکلیف نہیں پہنچے گی اور نہ ہی کوئی تنگی ہوگی“، تب آپ نے فرمایا: ”پھر مجھے ان دونوں کے ساتھ ہی دفن کرنا۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4569]

سیدنا قاسم بن محمد سے روایت ہے، انہوں نے کہا: میں نے سیدہ عائشہ رضی اللہ عنہا کے حجرہ مبارکہ میں موجود قبروں یعنی رسول اللہ صلی اللہ علیہ وسلم ، سیدنا ابوبکر اور سیدنا عمر رضی اللہ عنہما کی قبروں کو دیکھا تو میں نے پایا کہ ان پر سرخ کنکریاں «حَصْبَاءَ حَمْرَاءَ» پڑی ہوئی تھیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4570]

سیدنا انس رضی اللہ عنہ سے روایت ہے کہ سیدنا عمر رضی اللہ عنہ کی وفات ہوئی تو ان کی عمر تریسٹھ (63) سال تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4571]

سیدنا عبداللہ بن مسعود رضی اللہ عنہ سے روایت ہے، انہوں نے کہا: ”بے شک عمر رضی اللہ عنہ ایک مضبوط قلعہ تھے جس میں اسلام داخل تو ہوتا تھا مگر وہاں سے نکلتا نہیں تھا، پھر جب سیدنا عمر رضی اللہ عنہ شہید کر دیے گئے تو وہ قلعہ ٹوٹ گیا، اب اسلام اس سے نکلتا ہے اور اس میں داخل نہیں ہوتا، جب بھی نیک لوگوں کا ذکر کیا جائے تو «فحيَّهَلا» ”خوش آمدید و مرحبا“ عمر رضی اللہ عنہ کے لیے (کہا کرو)۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4572]

سیدنا جابر بن عبداللہ رضی اللہ عنہ سے روایت ہے کہ سیدنا علی رضی اللہ عنہ سیدنا عمر رضی اللہ عنہ کے پاس تشریف لائے جبکہ وہ «مُسجًّى» ”کپڑے میں ڈھانپے ہوئے (میت)“ تھے، پس علی رضی اللہ عنہ نے کہا: ”اللہ تم پر اپنی رحمتیں نازل فرمائے“، پھر فرمایا: ”لوگوں میں سے کوئی بھی ایسا شخص نہیں ہے جس کے اعمال نامے کے ساتھ اللہ سے ملنا مجھے اس ڈھانپے ہوئے شخص (عمر رضی اللہ عنہ) کے اعمال نامے کے ساتھ ملنے سے زیادہ پسند ہو۔“
امام حاکم فرماتے ہیں: شوریٰ کی وہ خبریں جو صحت کے ساتھ مروی ہیں، ان کا مخرج ابوبکر صدیق رضی اللہ عنہ کی وفات کے بعد سقیفہ بنی ساعدہ کی خبروں کے ساتھ جڑا ہوا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4573]