سیدنا ابوذر رضی اللہ عنہ کے آزاد کردہ غلام ابوثابت سے روایت ہے کہ میں جنگِ جمل کے دن سیدنا علی رضی اللہ عنہ کے ساتھ تھا، جب میں نے سیدہ عائشہ رضی اللہ عنہا کو (مدمقابل) کھڑے دیکھا تو میرے دل میں بھی وہ وسوسہ پیدا ہوا جو عام لوگوں کے دلوں میں آ رہا تھا، پھر ظہر کی نماز کے وقت اللہ نے مجھ سے وہ شک دور کر دیا اور میں نے امیر المؤمنین کے ساتھ مل کر قتال کیا، جب جنگ سے فراغت ہوئی تو میں مدینہ گیا اور ام المومنین سیدہ ام سلمہ رضی اللہ عنہا کی خدمت میں حاضر ہو کر عرض کیا: اللہ کی قسم میں کھانے پینے کا سوال کرنے نہیں آیا بلکہ میں ابوذر کا غلام ہوں، انہوں نے فرمایا: خوش آمدید، پھر میں نے انہیں اپنا سارا واقعہ سنایا تو انہوں نے پوچھا: تم اس وقت کہاں تھے جب لوگوں کے دل اڑے جا رہے تھے؟ میں نے عرض کیا: میں وہیں تھا جہاں زوالِ آفتاب کے وقت اللہ نے مجھ سے وہ شک دور فرما دیا، انہوں نے فرمایا: تم نے بہت اچھا کیا، میں نے رسول اللہ صلی اللہ علیہ وسلم کو فرماتے سنا ہے: ”علی قرآن کے ساتھ ہیں اور قرآن علی کے ساتھ ہے، یہ دونوں ہرگز ایک دوسرے سے جدا نہیں ہوں گے یہاں تک کہ حوضِ کوثر پر میرے پاس پہنچ جائیں۔“
یہ حدیث صحیح الاسناد ہے اور ابوسعید تیمی ثقہ و مامون ہیں، لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4678]

سیدنا علی رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اللہ علی پر رحم فرمائے، اے اللہ! حق کو اسی طرف موڑ دے جس طرف علی مڑیں۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4679]

عبداللہ بن عمرو بن ہند جملی سے مروی ہے کہ میں نے سیدنا علی رضی اللہ عنہ کو یہ فرماتے سنا: ”میں جب رسول اللہ صلی اللہ علیہ وسلم سے کچھ سوال کرتا تو آپ صلی اللہ علیہ وسلم مجھے عطا فرماتے (جواب دیتے)، اور جب میں خاموش رہتا تو آپ صلی اللہ علیہ وسلم خود (علمی گفتگو کی) ابتدا فرماتے تھے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4680]