سیدنا زید بن ارقم رضی اللہ عنہ سے روایت ہے کہ رسول اللہ صلی اللہ علیہ وسلم کے چند صحابہ کے گھروں کے دروازے مسجد میں کھلتے تھے، ایک دن آپ صلی اللہ علیہ وسلم نے فرمایا: ”علی کے دروازے کے سوا یہ تمام دروازے بند کر دو،“ راوی کہتے ہیں کہ لوگوں نے اس پر چہ میگوئیاں کیں تو رسول اللہ صلی اللہ علیہ وسلم کھڑے ہوئے، اللہ کی حمد و ثنا بیان کی اور پھر فرمایا: ”امابعد! مجھے علی کے دروازے کے علاوہ یہ تمام دروازے بند کرنے کا حکم دیا گیا ہے، تمہارے درمیان کسی کہنے والے نے اس پر بات کی ہے، اللہ کی قسم! میں نے اپنی مرضی سے کچھ بند کیا نہ کھولا، بلکہ مجھے ایک بات کا حکم دیا گیا تو میں نے اسی کی پیروی کی۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4681]

سیدنا ابوہریرہ رضی اللہ عنہ سے روایت ہے کہ سیدنا عمر بن خطاب رضی اللہ عنہ نے فرمایا: ”علی بن ابی طالب رضی اللہ عنہ کو تین ایسی خصلتیں عطا کی گئی ہیں کہ اگر ان میں سے ایک بھی مجھے مل جاتی تو وہ میرے لیے سرخ اونٹوں کی دولت سے زیادہ محبوب ہوتی،“ عرض کیا گیا: اے امیر المؤمنین! وہ کیا ہیں؟ انہوں نے فرمایا: ”پہلی ان کا رسول اللہ صلی اللہ علیہ وسلم کی صاحبزادی سیدہ فاطمہ سے نکاح، دوسری ان کا رسول اللہ صلی اللہ علیہ وسلم کے ساتھ مسجد میں رہائش پذیر ہونا کہ ان کے لیے وہاں وہ سب حلال تھا جو آپ صلی اللہ علیہ وسلم کے لیے حلال تھا، اور تیسری خیبر کے دن جھنڈا ملنا۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4682]