علی بن ابی طلحہ سے روایت ہے کہ ہم نے حج کیا اور مدینہ میں سیدنا حسن بن علی رضی اللہ عنہما کے پاس سے گزرے، ہمارے ساتھ معاویہ بن حدیج بھی تھا، سیدنا حسن سے کہا گیا کہ یہ معاویہ بن حدیج ہے جو سیدنا علی کو برا بھلا کہتا ہے، آپ نے فرمایا: ”اسے میرے پاس لاؤ،“ جب وہ لایا گیا تو آپ نے پوچھا: ”کیا تم علی کو برا بھلا کہتے ہو؟“ اس نے کہا: ”میں نے ایسا نہیں کیا،“ آپ نے فرمایا: ”اللہ کی قسم! اگر تم ان سے ملے، اور میرا نہیں خیال کہ تم قیامت کے دن ان سے مل سکو گے، تو تم انہیں رسول اللہ صلی اللہ علیہ وسلم کے حوض پر کھڑا پاؤ گے جہاں وہ منافقوں کے جھنڈوں کو اپنے ہاتھ میں موجود عوسج کی لاٹھی سے دور ہٹا رہے ہوں گے؛ مجھے یہ بات صادق و مصدوق صلی اللہ علیہ وسلم نے بیان فرمائی ہے، اور وہ شخص نامراد ہوا جس نے بہتان باندھا۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4720]