سیدنا علی رضی اللہ عنہ سے روایت ہے کہ رسول اللہ صلی اللہ علیہ وسلم نے مجھ سے فرمایا: ”اے علی! کیا میں تمہیں ایسے کلمات نہ سکھاؤں کہ اگر تم انہیں کہو تو تمہاری مغفرت کر دی جائے، حالانکہ تمہاری مغفرت تو پہلے ہی ہو چکی ہے: «لَا إِلَهَ إِلَّا اللهُ الْعَلِيُّ الْعَظِيمُ، لَا إِلَهَ إِلَّا اللهُ الْحَلِيمُ الْكَرِيمُ، سُبْحَانَ اللهِ رَبِّ الْعَرْشِ الْعَظِيمُ، وَالْحَمْدُ لِلَّهِ رَبِّ الْعَالَمِينَ.» ”اللہ کے سوا کوئی معبود نہیں جو بلند و برتر اور عظمت والا ہے، اللہ کے سوا کوئی معبود نہیں جو نہایت بردبار اور کریم ہے، پاک ہے وہ اللہ جو عرشِ عظیم کا رب ہے، اور تمام تعریفیں اللہ ہی کے لیے ہیں جو تمام جہانوں کا پروردگار ہے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4721]

ام المومنین سیدہ ام سلمہ رضی اللہ عنہا بیان کرتی ہیں: ”اس ذات کی قسم جس کی میں قسم اٹھاتی ہوں! سیدنا علی رضی اللہ عنہ (وفات کے وقت) رسول اللہ صلی اللہ علیہ وسلم کے سب سے قریب تھے۔ ہم صبح کے وقت رسول اللہ صلی اللہ علیہ وسلم کی عیادت کے لیے حاضر ہوئے تو آپ صلی اللہ علیہ وسلم بار بار دریافت فرما رہے تھے: ”کیا علی آگیا؟ کیا علی آگیا؟“ سیدہ فاطمہ رضی اللہ عنہا نے عرض کیا: گویا آپ نے انہیں کسی کام سے بھیجا ہے؟ راویہ کہتی ہیں کہ اس کے بعد وہ تشریف لے آئے، سیدہ ام سلمہ فرماتی ہیں کہ میں نے محسوس کیا کہ آپ صلی اللہ علیہ وسلم کو ان سے کوئی ضروری بات کرنی ہے، چنانچہ ہم گھر سے باہر نکل کر دروازے کے پاس بیٹھ گئے اور میں دروازے کے سب سے قریب تھی، پس رسول اللہ صلی اللہ علیہ وسلم ان کی طرف جھک گئے اور ان سے سرگوشی اور خفیہ گفتگو کرنے لگے، پھر اسی روز رسول اللہ صلی اللہ علیہ وسلم کی روح قبض ہو گئی، چنانچہ سیدنا علی رضی اللہ عنہ ہی وفات کے وقت آپ صلی اللہ علیہ وسلم کے سب سے قریب تھے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4722]