عبداللہ بن محمد بن حنفیہ سے مروی ہے، انہوں نے اس سال جس میں ان کا انتقال ہوا (یعنی سن 81 ہجری) فرمایا: ”اس وقت میری عمر پینسٹھ سال ہو چکی ہے، میں اپنے والد کی عمر سے بھی آگے نکل گیا ہوں، کیونکہ میرے والد کا جب انتقال ہوا تو ان کی عمر تریسٹھ سال تھی۔“ اور اسی سال ابن حنفیہ کی وفات ہوئی۔
امام حاکم نے کہا: جہاں تک امیر المؤمنین سیدنا علی رضی اللہ عنہ کی مدتِ خلافت کا تعلق ہے، تو وہ اسی کے مطابق ہے جس کا فیصلہ جناب نبی کریم صلی اللہ علیہ وسلم نے فرمایا ہے: [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4747]

سیدنا سفینہ ابوعبدالرحمن رضی اللہ عنہ (رسول اللہ صلی اللہ علیہ وسلم کے آزاد کردہ غلام) سے روایت ہے کہ نبی کریم صلی اللہ علیہ وسلم نے فرمایا: ”خلافتِ نبوت تیس سال تک رہے گی۔“ سعید کہتے ہیں کہ آپ (مدتِ خلافت کا) حساب کر لیں: سیدنا ابوبکر کی خلافت دو سال، سیدنا عمر بن خطاب کی دس سال، سیدنا عثمان بن عفان کی بارہ سال اور سیدنا علی کی مدتِ خلافت چھ سال بنتی ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4748]

صعصعہ بن صوحان سے روایت ہے کہ جب ابن ملجم نے سیدنا علی رضی اللہ عنہ پر قاتلانہ حملہ کیا تو آپ نے ہمیں خطبہ دیا، ہم نے عرض کیا: اے امیر المؤمنین! ہمارے لیے کسی کو خلیفہ نامزد فرما دیں، تو آپ نے فرمایا: ”میں تمہیں اسی حال میں چھوڑ رہا ہوں جس حال میں رسول اللہ صلی اللہ علیہ وسلم نے ہمیں چھوڑا تھا۔“ ہم نے (پہلے) عرض کیا تھا: اے اللہ کے رسول! ہمارے لیے کسی کو خلیفہ بنا دیں، تو آپ صلی اللہ علیہ وسلم نے فرمایا تھا: ”اگر اللہ تمہارے حق میں خیر جانتا ہوگا تو تم پر تمہارے بہترین شخص کو حاکم بنا دے گا۔“ سیدنا علی رضی اللہ عنہ نے فرمایا: ”چنانچہ اللہ نے ہمارے حق میں خیر دیکھی تو سیدنا ابوبکر رضی اللہ عنہ کو ہم پر امیر بنا دیا۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4749]