سیدنا علی بن ابی طالب رضی اللہ عنہ سے روایت ہے، انہوں نے کہا: رسول اللہ صلی اللہ علیہ وسلم ہمارے پاس تشریف لائے اور اپنا قدم مبارک میرے اور فاطمہ (رضی اللہ عنہا) کے درمیان رکھ دیا، پھر ہمیں وہ کلمات سکھائے جو ہمیں بستر پر لیٹتے وقت کہنے چاہئیں، آپ صلی اللہ علیہ وسلم نے فرمایا: ”اے فاطمہ! جب تم دونوں اپنے بستر پر آ جاؤ تو 33 مرتبہ سبحان اللہ، 33 مرتبہ الحمد للہ اور 34 مرتبہ اللہ اکبر کہا کرو۔“ سیدنا علی رضی اللہ عنہ بیان کرتے ہیں کہ اللہ کی قسم! میں نے اس کے بعد کبھی ان کلمات کو نہیں چھوڑا، تو ایک شخص نے جن کے دل میں سیدنا علی کے خلاف کچھ انقباض تھا سوال کیا: کیا صفین کی رات بھی آپ نے یہ کلمات نہیں چھوڑے؟ انہوں نے جواب دیا: ہاں، صفین کی رات بھی میں نے یہ تسبیحات ترک نہیں کیں۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4777]