سیدنا ثوبان رضی اللہ عنہ فرماتے ہیں ایک مرتبہ رسول اللہ صلی اللہ علیہ وسلم سیدہ فاطمہ رضی اللہ عنہا کے پاس تشریف لائے، اس وقت میں بھی رسول اللہ صلی اللہ علیہ وسلم کے ہمراہ تھا، سیدہ خاتون جنت رضی اللہ عنہا نے گلے میں سونے کا ہار پہنا ہوا تھا، کہنے لگی: یہ مجھے حسن کے والد نے تحفہ دیا ہے۔ رسول اللہ صلی اللہ علیہ وسلم نے ارشاد فرمایا: کیا تمہیں یہ بات اچھی لگتی ہے کہ لوگ ایسی باتیں کہیں کہ یہ فاطمہ بنت محمد ہے اور اس کے گلے آگ کا ہار ہے۔ یہ کہہ کر رسول اللہ صلی اللہ علیہ وسلم کھڑے کھڑے وہاں سے تشریف لے گئے، سیدہ خاتون جنت نے اس ہار کے بدلے ایک غلام خریدا اور اس کو آزاد کر دیا۔ اس بات کی اطلاع رسول اللہ صلی اللہ علیہ وسلم تک پہنچی تو آپ صلی اللہ علیہ وسلم نے فرمایا: تمام تعریفیں اس ذات کے لئے ہیں جس نے فاطمہ کو آگ سے بچا لیا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4778]

سیدنا عبداللہ بن مسعود رضی اللہ عنہ فرماتے ہیں: رسول اللہ صلی اللہ علیہ وسلم نے ارشاد فرمایا: بے شک فاطمہ نے اپنی عزت کی حفاظت کی ہے اللہ تعالیٰ نے ان کی اولاد پر دوزخ کی آگ حرام فرما دی ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4779]