سیدنا عبدالرحمن بن ابی الرجال رضی اللہ عنہ فرماتے ہیں: سیدنا اسعد بن زرارہ رضی اللہ عنہ نے ہجرت کے نویں مہینے شوال میں وصال فرمایا۔ ان دونوں مسجد نبوی شریف کی تعمیر ہو رہی تھی۔ اور یہ جنگ بدر سے پہلے کا واقعہ ہے۔ بنی نجار رسول اللہ صلی اللہ علیہ وسلم کی خدمت میں حاضر ہو کر کہنے لگے: یا رسول اللہ صلی اللہ علیہ وسلم ہمارا نقیب انتقال کر گیا ہے، آپ کسی اور کو ہمارا نقیب مقرر فرما دیں۔ نبی اکرم صلی اللہ علیہ وسلم نے فرمایا: تمہارا نقیب میں ہوں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4917]

٭ابن عمر رضی اللہ عنہما عبدالجبار بن عمارہ کے حوالے سے عبداللہ بن ابی بکر بن عمرو بن حزم کا یہ بیان نقل کرتے ہیں ” جنت البقیع میں سب سے پہلے سیدنا اسعد بن زرارہ رضی اللہ عنہ کی تدفین ہوئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4918]

ابوامامہ سیدنا عبدالرحمن بن کعب بن مالک رضی اللہ عنہ فرماتے ہیں: جب میرے والد صاحب بینائی سے محروم ہو گئے تو میں ان کو ساتھ لے کر چلا کرتا تھا۔ وہ جب بھی اذان جمعہ سنتے تو کہتے ” رحمۃ اللہ علی اسعد بن زرارہ۔ میں (کچھ عرصہ تو یہ سنتا رہا لیکن بالآخر میں) نے یہ پکا فیصلہ کر لیا کہ میں اپنے والد سے اس کی وجہ ضرور پوچھوں گا۔ چنانچہ ایک دن میں نے پوچھ ہی لیا کہ ابا جی! آپ جب بھی اذان جمعہ سنتے ہیں تو ابوامامہ کے لئے دعا مانگتے ہیں مجھے اس سے بہت حیرانگی ہوتی ہے اس کی وجہ کیا ہے؟ تو میرے والد صاحب نے فرمایا: یہ پہلے شخص ہیں جنہوں نے مدینہ میں قبیلہ بنی بیاضہ کے سنگستان کے نشیب میں (جس کو بقیع الخضمات بھی کہتے ہیں) ہمیں جمعہ کی نماز پڑھائی تھی۔ میں نے پوچھا: اس دن آپ لوگوں کی تعداد کس قدر تھی؟ تو انہوں نے فرمایا: ہم چالیس آدمی تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4919]

سیدنا انس رضی اللہ عنہ فرماتے ہیں کہ نبی اکرم صلی اللہ علیہ وسلم نے خود اپنے ہاتھ سے سیدنا اسعد بن زرارہ رضی اللہ عنہ کا کانٹا لگنے کی وجہ سے داغا تھا۔ (جب کسی کے کوئی زخم وغیرہ ہو جاتا تو لوہے کو گرم کر کے اس مقام پر داغتے تھے اس طرح زخم کا زہر پھیلتا نہیں تھا اس عمل کو الکی کہتے ہیں) ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4920]