سیدنا عبداللہ بن عباس رضی اللہ عنہما فرماتے ہیں: رسول اللہ صلی اللہ علیہ وسلم کے چچا سیدنا حمزہ رضی اللہ عنہ حالت جنابت (جس حالت میں انسان پر غسل فرض ہوتا ہے) میں شہید ہوئے۔ تو رسول اللہ صلی اللہ علیہ وسلم نے ان کے بارے میں فرمایا: ان کو فرشتوں نے غسل دیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4946]

سیدنا اسامہ بن زید رضی اللہ عنہ فرماتے ہیں: رسول اللہ صلی اللہ علیہ وسلم سیدنا حمزہ رضی اللہ عنہ کی صاحبزادی قبیصہ رضی اللہ عنہا کے گھر کی جانب روانہ ہوئے۔ ان کے دروازے پر پہنچ کر کہا: السلام علیکم، کیا ابوعمارہ رضی اللہ عنہ گھر میں ہیں؟ انہوں نے جواباً کہا: جی نہیں۔ خدا کی قسم! میرے ماں باپ آپ پر قربان ہوں، وہ آپ ہی کی طرف گئے ہیں۔ شاید وہ بنی نجار کی کسی دوسری گلی سے چلے گئے اور آپ کا سامنا نہ ہو سکا۔ یا رسول اللہ صلی اللہ علیہ وسلم کیا آپ اندر تشریف نہیں لائیں گے؟ آپ صلی اللہ علیہ وسلم نے فرمایا: کیا تیرے پاس کچھ ہے؟ انہوں نے کہا: جی ہاں۔ چنانچہ انہوں نے حضور صلی اللہ علیہ وسلم کو حیس (ایسا طعام ہے جس میں کھجوریں اور خشک دودھ اور گھی وغیرہ ڈال کر اسے پکایا جاتا ہے) پیش کیا اور کہنے لگی: یا رسول اللہ صلی اللہ علیہ وسلم میرے ماں باپ آپ پر قربان ہو جائیں، آپ بے تکلف ہو کر تناول فرمائیں۔ یا رسول اللہ صلی اللہ علیہ وسلم آپ نے خود قدم رنجہ فرما دیا ہے ورنہ میں آپ کو مبارک دینے کے لئے آنے ہی والی تھی مجھے ابوعمارہ رضی اللہ عنہ نے بتایا ہے کہ اللہ تعالیٰ نے آپ کو ایک جنتی نہر عطا فرمائی ہے جس کو ” کوثر “ کہا جاتا ہے۔ تو رسول اللہ صلی اللہ علیہ وسلم نے فرمایا: اور اس کے پیالوں کی تعداد آسمان کے ستاروں سے بھی بڑھ کر ہے۔ اور اس نہر پر آنے والوں میں مجھے سب سے زیادہ عزیز تیری قوم کے لوگ ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4947]

سیدنا انس رضی اللہ عنہ فرماتے ہیں: جنگ احد کے دن رسول اللہ صلی اللہ علیہ وسلم جب سیدنا حمزہ رضی اللہ عنہ کی لاش مبارک کے پاس تشریف لائے تو ان کے ناک کان وغیرہ کاٹ کر چہرہ انور کو بگاڑ دیا گیا تھا۔ آپ صلی اللہ علیہ وسلم نے فرمایا: اگر سیدہ صفیہ رضی اللہ عنہ کی پریشانی کا خیال نہ ہوتا تو میں انہیں اسی طرح (بے گور و کفن) چھوڑ دیتا حتی کہ اللہ تعالیٰ قیامت کے دن ان کو پرندوں اور درندوں کے پیٹ سے اٹھاتا۔ پھر ان کو ایک دھاری دار چادر میں کفن دیا گیا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4948]

سیدنا جابر بن عبداللہ رضی اللہ عنہما فرماتے ہیں: ایک آدمی کے گھر بچہ پیدا ہوا، انہوں نے حضور صلی اللہ علیہ وسلم سے پوچھا کہ اس بچے کا نام کیا رکھا جائے؟ تو آپ صلی اللہ علیہ وسلم نے فرمایا: اس کا وہ نام رکھو، جو مجھے سب سے زیادہ اچھا لگتا ہے۔ (اور وہ ہے) سیدنا عبدالمطلب کے صاحبزادے کا نام ” حمزہ “۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4949]

سیدنا عمرو بن دینار رضی اللہ عنہ فرماتے ہیں میں نے مدینہ میں ایک آدمی کو یہ کہتے ہوئے سنا ہے کہ میرے دادا جان، میرے والد کو رسول اللہ صلی اللہ علیہ وسلم کی خدمت لے کر آئے اور عرض کی: یا رسول اللہ صلی اللہ علیہ وسلم یہ میرا بیٹا ہے، میں اس کا نام کیا رکھوں؟ آپ صلی اللہ علیہ وسلم نے فرمایا: وہ نام رکھو جو مجھے تمام لوگوں سے زیادہ عزیز ہے (اور وہ ہے) سیدنا عبدالمطلب کے صاحبزادے کا نام ” حمزہ “ رضی اللہ عنہ۔ ٭٭ اس حدیث کی سند میں جو مجہول راوی ہیں ان کی حدیث کو ابن عیینہ کی سند کے حوالے سے نہیں لیا جاتا۔ اور اس سلسلے میں معتبر بات یعقوب بن حمید کی ہے۔ ابواحمد الحافظ مجھ سے اس بات کی بہت بحث کیا کرتا تھا کہ امام بخاری نے الجامع الصحیح (بخاری شریف) میں ان سے روایت نقل کی ہے جبکہ میں اس بات کا انکار کیا کرتا تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4950]

سیدنا عبداللہ بن عباس رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: میں گزشتہ رات جنت میں گیا، میں نے وہاں پر سیدنا جعفر رضی اللہ عنہ کو پرندوں کے ہمراہ اڑتے دیکھا تھا۔ اور سیدنا حمزہ رضی اللہ عنہ ایک تخت پر ٹیک لگائے بیٹھے تھے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ درج ذیل احادیث کو امام حاکم نے املاء نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4951]