سیدنا عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم تشریف فرما تھے اور اسماء بنت عمیس رضی اللہ عنہا آپ کے قریب ہی تھیں کہ اچانک آپ صلی اللہ علیہ وسلم نے سلام کا جواب دیا، پھر فرمایا: ”اے اسماء! یہ جعفر بن ابی طالب ہیں جو جبرائیل، میکائیل اور اسرافیل کے ساتھ ہیں، انہوں نے ہمیں سلام کیا ہے، تم بھی انہیں سلام کا جواب دو، اور انہوں نے مجھے بتایا ہے کہ ان کا فلاں فلاں دن مشرکین سے مقابلہ ہوا تھا - یہ واقعہ رسول اللہ صلی اللہ علیہ وسلم کے پاس سے ان کے گزرنے سے تین یا چار دن پہلے کا ہے - جعفر نے بتایا: میں مشرکین سے لڑا، میرے جسم کے اگلے حصے پر نیزوں، تیروں اور تلواروں کے تہتر زخم لگے، پھر میں نے جھنڈا اپنے دائیں ہاتھ میں تھام لیا تو وہ کاٹ دیا گیا، پھر میں نے بائیں ہاتھ سے پکڑا تو وہ بھی کاٹ دیا گیا، تو اللہ تعالیٰ نے مجھے میرے دونوں ہاتھوں کے بدلے دو پر عطا فرما دیے جن کے ذریعے میں جبرائیل اور میکائیل کے ساتھ اڑتا ہوں، میں جنت میں جہاں چاہتا ہوں اترتا ہوں اور وہاں کے جو پھل چاہتا ہوں کھاتا ہوں“، اسماء رضی اللہ عنہا نے عرض کیا: جعفر کو اللہ نے جو خیر عطا فرمائی وہ انہیں مبارک ہو، لیکن مجھے ڈر ہے کہ لوگ اس کی تصدیق نہ کریں، اس لیے آپ منبر پر تشریف لے جا کر لوگوں کو اس کی خبر دیں، چنانچہ آپ صلی اللہ علیہ وسلم منبر پر تشریف لے گئے، اللہ کی حمد و ثنا بیان کی اور فرمایا: ”اے لوگو! بے شک جعفر، جبرائیل اور میکائیل کے ساتھ ہیں، ان کے دو پر ہیں جو اللہ نے انہیں ان کے ہاتھوں کے بدلے عطا کیے ہیں، انہوں نے مجھے سلام کیا ہے“، پھر آپ صلی اللہ علیہ وسلم نے لوگوں کو ان کے اس واقعے کی خبر دی جب ان کا مشرکین سے مقابلہ ہوا تھا، پس لوگوں پر اس دن کے بعد یہ واضح ہو گیا جب رسول اللہ صلی اللہ علیہ وسلم نے انہیں خبر دی تھی کہ جعفر کا ان سے مقابلہ ہوا؛ اسی لیے انہیں جنت میں «الطَّيَّار» ”اڑنے والا“ کہا جاتا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5001]