سیدہ ام قیس بنت محصن رضی اللہ عنہا بیان کرتی ہیں کہ جب رسول اللہ صلی اللہ علیہ وسلم کی وفات ہوئی تو سیدنا عکاشہ رضی اللہ عنہ چالیس برس کے تھے، اور اس کے ایک سال بعد سن 12 ہجری میں سیدنا ابوبکر صدیق رضی اللہ عنہ کے دورِ خلافت میں مقامِ بزاخہ پر شہید ہوئے، اور عکاشہ رضی اللہ عنہ خوبصورت ترین انسانوں میں سے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5079]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جنت میں داخل ہونے والا پہلا گروہ چودہویں رات کے چاند کی طرح چمکتے چہروں کے ساتھ داخل ہوگا، پھر ان کے بعد وہ لوگ ہوں گے جو آسمان میں چمکنے والے روشن ترین ستارے کی مانند ہوں گے۔“ یہ سن کر سیدنا عکاشہ بن محصن رضی اللہ عنہ کھڑے ہوئے اور عرض کیا: اے اللہ کے رسول! اللہ سے دعا کیجیے کہ وہ مجھے ان میں شامل فرما دے، آپ صلی اللہ علیہ وسلم نے فرمایا: ”اے اللہ! اسے ان میں شامل فرما دے۔“ پھر ایک اور شخص کھڑا ہوا اور عرض کیا: اے اللہ کے رسول! اللہ سے دعا کیجیے کہ وہ مجھے بھی ان میں شامل فرما دے، تو آپ صلی اللہ علیہ وسلم نے فرمایا: ”عکاشہ تم سے سبقت لے گئے۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5080]