سیدنا ام قیس بنت محصن فرماتی ہیں: جب رسول اللہ صلی اللہ علیہ وسلم کا انتقال ہوا، اس وقت عکاشہ چالیس برس کے تھے، اور آپ سیدنا ابوبکر رضی اللہ عنہ کے دور خلافت میں بارہویں سن ہجری میں مقام بزاخہ میں نیزہ لگنے سے شہید ہوئے، اور سیدنا عکاشہ رضی اللہ عنہ بہت خوبصورت نوجوان تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5079]

سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: سب سے پہلے جو جماعت جنت میں جائے گی، ان کے چہرے چودہویں رات کے چاند کی طرح چمک رہے ہوں گے، جو ان کے بعد جائیں گے ان کے چہرے ستاروں کی طرح جگمگا رہے ہوں گے۔ سیدنا عکاشہ رضی اللہ عنہ اٹھ کر کھڑے ہوئے اور عرض کی: یا رسول اللہ صلی اللہ علیہ وسلم ! دعا فرمائیں کہ اللہ تعالیٰ مجھے بھی ان میں سے کر دے، رسول اللہ صلی اللہ علیہ وسلم نے دعا کی: اے اللہ! اس کو ان میں سے کر دے۔ (یہ دعا سن کر) ایک اور صحابی اٹھ کر کھڑے ہوئے اور کہنے لگے: یا رسول اللہ صلی اللہ علیہ وسلم ! میرے لئے بھی دعا فرمائیں کہ اللہ تعالیٰ مجھے بھی ان میں سے کر دے، رسول اللہ صلی اللہ علیہ وسلم نے فرمایا: اس معاملے میں عکاشہ تم سے آگے نکل گیا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5080]