یحییٰ بن بکیر کہتے ہیں کہ عتبہ بن مسعود رضی اللہ عنہ کی وفات سنہ 44 ہجری میں ہوئی اور ان سے صرف ایک ہی حدیث مروی ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5205]

عون بن عبد اللہ بن عتبہ اپنے والد کے واسطے سے اپنے دادا (عتبہ بن مسعود) سے روایت کرتے ہیں کہ ایک خاتون رسول اللہ صلی اللہ علیہ وسلم کی خدمت میں ایک سیاہ فام لونڈی لے کر آئی اور عرض کیا: یا رسول اللہ! مجھ پر ایک مومن گردن (غلام یا لونڈی) آزاد کرنا لازم ہے، تو کیا یہ میری طرف سے کافی ہوگی؟ رسول اللہ صلی اللہ علیہ وسلم نے اس لونڈی سے دریافت فرمایا: ”تمہارا رب کون ہے؟“ اس نے کہا: میرا رب اللہ ہے، آپ صلی اللہ علیہ وسلم نے پوچھا: ”تمہارا دین کیا ہے؟“ اس نے کہا: اسلام، آپ صلی اللہ علیہ وسلم نے پوچھا: ”میں کون ہوں؟“ اس نے کہا: آپ اللہ کے رسول ہیں، آپ صلی اللہ علیہ وسلم نے پوچھا: ”کیا تم پانچوں نمازیں پڑھتی ہو اور اس بات کا اقرار کرتی ہو جو میں اللہ کے پاس سے لایا ہوں؟“ اس نے عرض کیا: جی ہاں، تو آپ صلی اللہ علیہ وسلم نے اس کی کمر پر تھپکی دی اور فرمایا: ”اسے آزاد کر دو۔“ اور عبد اللہ بن عتبہ بن مسعود نے نبی کریم صلی اللہ علیہ وسلم کا عہد پایا ہے اور آپ صلی اللہ علیہ وسلم سے (احادیث) سنی ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5206]

حمزہ بن عبد اللہ بن عتبہ کہتے ہیں کہ میں نے اپنے والد عبد اللہ بن عتبہ بن مسعود سے سوال کیا: آپ کو رسول اللہ صلی اللہ علیہ وسلم کی کون سی بات یاد ہے؟ انہوں نے کہا: مجھے یاد ہے کہ آپ صلی اللہ علیہ وسلم نے مجھے پکڑا جبکہ میں پانچ یا چھ سال کا تھا، پھر مجھے اپنی گود میں بٹھایا، میرے سر پر ہاتھ پھیرا اور میرے لیے اور میری اولاد کے لیے برکت کی دعا فرمائی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5207]