مصعب بن عبداللہ زبیری فرماتے ہیں:” شرحبیل بن حسنہ “۔ یہ بھی کہا گیا ہے کہ ان کی والدہ سیدنا سفیان بن معمر بن حبیب بن وہب بن حذافہ بن جمع کے نکاح میں تھیں۔ اور سیدنا سفیان کے ہمراہ ہجرت بھی کی۔ اور جو شرحبیل ہیں یہ عبداللہ بن مطاع بن عمرو ہیں، یمن کے رہنے والے ہیں، اور یہ سفیان، جمیل بن معمر ہیں، اور جمیل کو ذہانت اور فطانت کی وجہ سے ” ذوالقلبین “ (دو دلوں والا) کہا جاتا تھا۔ انہی کے بارے میں اللہ تعالیٰ نے فرمایا ہے: مَا جَعَلَ اللّٰہَ لِرَجُلٍّ مِنْ قَلْبَیْنَ فِی جَوْفِہِ (الاحزاب: 4) ” اللہ نے کسی آدمی کے اندر دو دل نہ رکھے “ انہوں نے رسول اللہ صلی اللہ علیہ وسلم کے ہمراہ غزوہ حنین میں شرکت کی۔ آپ 18 ہجری کو سیدنا عمر رضی اللہ عنہ کے دور خلافت میں جنگ یرموک میں شہید ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5282]

محمد بن عمر فرماتے ہیں: اور شرحبیل بن حسنہ۔ اور حسنہ ان کی والدہ ہیں اور یہ عدولیہ ہیں اور شرحبیل کے والد عبداللہ بن مطاع بن عمرو ہیں، کندہ قبیلے سے تعلق رکھتے ہیں جو کہ بنی زہرہ کے حلیف تھے۔ ان کی کنیت ابوعبداللہ تھی اور یہ حبشہ کی جانب دوسری ہجرت کرنے والوں میں شریک تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5283]

محمد بن اسحاق نے حبشہ کی جانب ہجرت کرنے والوں میں شرحبیل بن حسنہ کا بھی ذکر کیا ہے ان کی والدہ اپنے شوہر سفیان بن معمر بن حبیب بن وہب بن حذافہ بن جمح کے ہمراہ حبشہ کی جانب ہجرت کی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5284]

خلیفہ بن خیاط نے کہا:” شرحبیل بن عبداللہ بن مطاع بن عمرو بن عبدالعزیز “ ان کی والدہ ” حسنہ “ ہیں۔ اور ان کی ولاء (اختیارات) عثمان بن حبیب کے لئے تھیں۔ شرحبیل بن حسنہ 67 سال کی عمر میں 18 ہجری کو عمواس کے طاعون میں شہید ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5285]