سیدنا ابو وائل رضی اللہ عنہ سے روایت ہے کہ سیدنا خالد بن ولید رضی اللہ عنہ نے اہل فارس کو اسلام کی دعوت دیتے ہوئے خط لکھا: ”بسم اللہ الرحمن الرحیم، خالد بن ولید کی جانب سے رستم، مہران اور اہل فارس کے سرداروں کے نام، اس شخص پر سلامتی ہو جو ہدایت کی پیروی کرے، حمد و ثنا کے بعد! ہم تمہیں اسلام کی دعوت دیتے ہیں، اگر تم انکار کرو تو اپنے ہاتھ سے جزیہ ادا کرو اس حال میں کہ تم مغلوب ہو، اور اگر تم یہ بھی تسلیم نہ کرو تو میرے ساتھ ایسی قوم ہے جو اللہ کی راہ میں قتل ہونا ویسے ہی پسند کرتی ہے جیسے اہل فارس شراب کو پسند کرتے ہیں، والسلام۔“
خالد بن ولید رضی اللہ عنہ کی وفات کے وقت میں اختلاف ہے، میں پہلے واقدی کے حوالے سے ذکر کر چکا ہوں کہ ان کی وفات سن 21 ہجری میں ہوئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5384]

مصعب بن عبد اللہ بیان کرتے ہیں کہ سیدنا خالد بن ولید رضی اللہ عنہ کی وفات سن 22 ہجری میں مدینہ منورہ میں ہوئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5385]

خلیفہ بن خیاط بیان کرتے ہیں کہ سیدنا خالد بن ولید رضی اللہ عنہ کی وفات شام میں ہوئی، ایک قول کے مطابق حمص میں سن 21 ہجری میں ہوئی، جبکہ یحییٰ بن بکیر کا کہنا ہے کہ ان کی وفات سن 17 یا 18 ہجری میں مدینہ منورہ میں ہوئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5386]