عمرو بن وابصہ اسدی کے والد فرماتے ہیں کہ میں کوفہ میں اپنے گھر میں تھا، دروازے پر کسی نے سلام کہہ کر اندر آنے کی اجازت مانگی، میں نے سلام کا جواب دیا اور اندر آنے کی اجازت دے دی۔ جب وہ آدمی اندر داخل ہوا تو وہ سیدنا عبداللہ بن مسعود رضی اللہ عنہ تھے۔ میں نے ان سے کہا: اے ابوعبدالرحمن! انتہائی سخت دوپہر میں ملاقات کا یہ کون سا وقت ہے؟ انہوں نے کہا: مجھے تو دن بہت لمبا محسوس ہو رہا تھا میں نے سوچا کہ کسی آدمی کے پاس جا کر احادیث کا تکرار ہی کر لیا جائے۔ چنانچہ ہم ایک دوسرے کو احادیث بیان کرنے لگے، انہوں نے مجھے یہ حدیث سنائی کہ رسول اللہ صلی اللہ علیہ وسلم نے ارشاد فرمایا ہے کہ ایک وقت میں فتنے عام ہوں گے، اس وقت سوئے ہوئے شخص کا فتنہ لیٹے ہوئے شخص سے کم ہو گا۔ اور لیٹا ہوا شخص بیٹھے ہوئے سے بہتر ہو گا، اور بیٹھا ہوا شخص کھڑے ہوئے سے بہتر ہو گا۔ اور کھڑا ہوا پیدل چلنے والے سے بہتر ہو گا اور پیدل چلنے والا سوار سے بہتر ہو گا۔ پھر فرمایا: سب کے سب لوگ دوزخی ہوں گے۔ میں نے پوچھا: یا رسول اللہ صلی اللہ علیہ وسلم یہ وقت کب آئے گا؟ آپ نے فرمایا: ہرج کے دنوں میں۔ میں نے پوچھا: یا رسول اللہ صلی اللہ علیہ وسلم ہرج کے دن کون سے ہوں گے؟ آپ صلی اللہ علیہ وسلم نے فرمایا: جب کوئی شخص اپنے دوست سے محفوظ نہیں ہو گا۔ میں نے پوچھا: یا رسول اللہ صلی اللہ علیہ وسلم اگر میں وہ زمانہ پاؤں تو اس وقت کے لئے آپ مجھے کیا ارشاد فرماتے ہیں؟ آپ صلی اللہ علیہ وسلم نے فرمایا: اپنے سانس اور ہاتھ کو روک کر گھر میں بیٹھ جانا۔ میں نے پوچھا: یا رسول اللہ صلی اللہ علیہ وسلم اگر کوئی شخص گھر میں مجھ پر حملہ آور ہو جائے تو میں کیا کروں؟ فرمایا: تو تم اپنی حویلی کے کسی کمرے میں گھس جانا۔ میں نے پوچھا: یا رسول اللہ صلی اللہ علیہ وسلم اگر وہ (دہشت گرد) میرے کمرے میں گھس آئے تو میں کیا کروں؟ فرمایا: یوں کر کے (یہ کہتے ہوئے آپ صلی اللہ علیہ وسلم نے اپنا دایاں ہاتھ الٹے ہاتھ کی کلائی پر رکھ کر) بیٹھ جانا اور ربی اللہ ربی اللہ پکارتے رہنا حتی کہ تمہاری موت واقع ہو جائے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5483]

مغیرہ بن ابی رزین کہتے ہیں: سیدنا عباس بن عبدالمطلب رضی اللہ عنہ سے پوچھا گیا: تم بڑے ہو یا نبی اکرم صلی اللہ علیہ وسلم بڑے ہیں؟ آپ نے فرمایا: عمر میری زیادہ ہے لیکن مجھ سے بڑے وہ ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5484]