سیدنا عروہ کہتے ہیں کہ شیطان کی جانب سے یہ آواز تھی کہ بے شک محمد صلی اللہ علیہ وسلم کو گرفتار کر لیا گیا ہے، یہ آواز سیدنا زبیر بن عوام رضی اللہ عنہ نے سن لی، اس وقت ان کی عمر گیارہ سال تھی، وہ تلوار سونت کر باہر نکلے اور رسول اللہ صلی اللہ علیہ وسلم کی بارگاہ میں حاضر ہو گئے، نبی اکرم صلی اللہ علیہ وسلم نے پوچھا: کیا بات ہے؟ سیدنا زبیر رضی اللہ عنہ نے کہا: یا رسول اللہ صلی اللہ علیہ وسلم میں یہ ارادہ لے کر نکلا ہوں کہ جس شخص نے آپ کو پکڑا ہے میں اس کو قتل کر دوں۔ نبی اکرم صلی اللہ علیہ وسلم نے ان کے لئے اور ان کی تلوار کے لئے دعا فرمائی۔ (راوی کہتے ہیں) یہ سب سے پہلی تلوار تھی جو اللہ تعالیٰ کی راہ میں سونتی گئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5650]

سیدنا علی رضی اللہ عنہ فرماتے ہیں: اسلام کا سب سے پہلا غزوہ، غزوہ بدر تھا، اور اس غزوہ میں ہمارے پاس صرف دو ہی گھوڑے تھے، ایک سیدنا مقداد رضی اللہ عنہ کا اور دوسرا سیدنا زبیر بن عوام رضی اللہ عنہ کا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5651]

سیدنا زبیر بن عوام رضی اللہ عنہ فرماتے ہیں: خدا کی قسم! رسول اللہ صلی اللہ علیہ وسلم جب بھی کسی بڑی یا چھوٹی جنگ میں گئے، میں ہمیشہ آپ صلی اللہ علیہ وسلم کے ساتھ رہا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5652]