یحییٰ بن سعید اپنے چچا سے روایت کرتے ہیں کہ جب جنگِ جمل کا دن تھا تو سیدنا علی رضی اللہ عنہ نے لوگوں میں منادی کرائی کہ: ”نہ کوئی تیر چلائے، نہ نیزہ مارے، نہ تلوار سے ضرب لگائے اور نہ ہی کسی کا پیچھا کرے، کیونکہ یہ ایسا مقام ہے جس میں جو غالب رہا وہ قیامت کے دن بھی کامیاب ہوگا۔“ انہوں نے بیان کیا کہ پھر ہم ایک دوسرے کے سامنے صف آرا ہو گئے، پھر ان لوگوں نے بیک زبان ہو کر پکارا: ”اے عثمان کے خون کا بدلہ لینے والو!“ انہوں نے کہا کہ ابن الحنفیہ جھنڈا لیے ہمارے سامنے تھوڑے فاصلے پر تھے، سیدنا علی رضی اللہ عنہ نے انہیں پکارا تو وہ ہماری طرف متوجہ ہوئے، انہوں نے عرض کی: اے امیر المؤمنین! وہ پکار رہے ہیں کہ اے عثمان کے خون کا بدلہ لینے والو، اس پر سیدنا علی رضی اللہ عنہ نے اپنے ہاتھ اٹھا دیے اور دعا کی: «اللهمَّ أكِبَّ قَتَلةَ عثمانَ اليومَ لوجوههم» ”اے اللہ! آج عثمان کے قاتلوں کو ان کے چہروں کے بل اوندھا گرا دے۔“ پھر سیدنا زبیر رضی اللہ عنہ نے اپنے ساتھ موجود دستوں سے کہا کہ ان پر تیروں کی بوچھاڑ کر دو، گویا وہ لڑائی شروع کرنا چاہتے تھے، جب ان کے ساتھیوں نے لڑائی شروع ہوتے دیکھی تو انہوں نے انتظار نہیں کیا اور حملہ کر دیا، پھر اللہ نے انہیں ہزیمت دے دی اور مروان بن حکم نے سیدنا طلحہ بن عبید اللہ رضی اللہ عنہ کو ایک تیر مارا جس نے ان کی پنڈلی کو ان کے گھوڑے کے پہلو کے ساتھ پیوست کر دیا، گھوڑا انہیں لے کر بھاگا یہاں تک کہ مروان نے انہیں جا لیا اور انہیں شہید کر دیا، پھر مروان ابان بن عثمان کی طرف متوجہ ہوا جو اس کے ساتھ تھا اور کہا: ”میں نے تمہارے باپ کے قاتلوں میں سے ایک سے تمہارا بدلہ لے لیا ہے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5692]