سیدنا زبیر رضی اللہ عنہ فرماتے ہیں کہ میں نے رسول اللہ صلی اللہ علیہ وسلم کو یہ فرماتے ہوئے سنا ہے: طلحہ نے جنت واجب کر لی ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن امام بخاری رحمۃ اللہ علیہ اور امام مسلم رحمۃ اللہ علیہ دونوں نے ہی اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5702]

موسیٰ بن طلحہ کہتے ہیں کہ سیدنا طلحہ رضی اللہ عنہ نے ذی قرد کے دن اونٹ ذبح کئے، ایک کنواں کھودا، یہ اونٹ لوگوں کو کھلا دیئے اور پانی پلا دیا۔ یہ دیکھ کر نبی اکرم صلی اللہ علیہ وسلم نے ان کو یوں مخاطب کیا ” اے فیاض طلحہ “ اسی دن سے ان کا نام ” طلحہ فیاض “ ہو گیا۔ (ذی قرد مدینہ منورہ کے قریب ایک مقام کا نام ہے اور اس مقام پر سن 6 ہجری کو جنگ ہوئی تھی، جس دن اس مقام پر جنگ ہوئی، اس دن کو ” یوم ذی قرد “ کہا جاتا ہے۔ شفیق الرحمن) ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5703]