یحیی بن معین فرماتے ہیں: سیدنا عبداللہ بن سلام کا نام ” حصین “ تھا، رسول اللہ صلی اللہ علیہ وسلم نے ان کا نام ” عبداللہ “ رکھ دیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5860]

محمد بن عمر کہتے ہیں: سیدنا عبداللہ بن سلام رضی اللہ عنہ کی کنیت ” ابویوسف “ تھی، اسلام لانے سے پہلے ان کا نام ” حصین “ تھا، جب آپ مسلمان ہو گئے تو رسول اللہ صلی اللہ علیہ وسلم نے ان کا نام ” عبداللہ “ رکھ دیا۔ یہ بنی اسرائیل میں سے ہیں، سیدنا یوسف بن یعقوب علیہ السلام کی اولاد امجاد میں سے ہیں۔ بنی عوف بن خزرج کے ایک قبیلہ قواقلہ کے حلیف تھے۔ تمام مؤرخین کا اس بات پر اتفاق ہے کہ سیدنا عبداللہ بن سلام رضی اللہ عنہ کا انتقال 43 ہجری میں سیدنا معاویہ رضی اللہ عنہ کی خلافت میں ہوا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5861]

یحیی بن سعید فرماتے ہیں: عبداللہ بن سلام رضی اللہ عنہ کے تمام حقوق رسول اللہ صلی اللہ علیہ وسلم کے لئے تھے، 43 ہجری میں ان کا انتقال ہوا۔ ٭٭ امام بخاری رحمۃ اللہ علیہ اور امام مسلم رحمۃ اللہ علیہ نے سیدنا سعد بن ابی وقاص کا یہ بیان نقل کیا ہے کہ نبی اکرم صلی اللہ علیہ وسلم نے سیدنا عبداللہ بن سلام رضی اللہ عنہ کے علاوہ کبھی کسی انسان کے لئے یہ نہیں کہا کہ یہ جنتی ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5862]