سیدنا جابر بن سمرہ رضی اللہ عنہ سے روایت ہے کہ رسول اللہ صلی اللہ علیہ وسلم سیدنا ابو ایوب رضی اللہ عنہ کے ہاں فروکش ہوئے، جب آپ صلی اللہ علیہ وسلم کھانا کھا لیتے تو اپنا بچا ہوا کھانا ان کی طرف بھیج دیتے، وہ رسول اللہ صلی اللہ علیہ وسلم کے دستِ مبارک کے نشانات تلاش کرتے اور وہیں اپنا ہاتھ رکھتے جہاں آپ صلی اللہ علیہ وسلم کی انگلیاں لگی ہوتیں، ایک دن انہوں نے آپ صلی اللہ علیہ وسلم کی خدمت میں کھانا بھیجا لیکن اس میں رسول اللہ صلی اللہ علیہ وسلم کی انگلیوں کے نشانات نہ پائے، وہ نبی کریم صلی اللہ علیہ وسلم کی خدمت میں حاضر ہوئے اور عرض کیا: یا رسول اللہ! میں نے آپ کی انگلیوں کے نشانات نہیں دیکھے، آپ صلی اللہ علیہ وسلم نے فرمایا: ”اس میں لہسن تھا“، شعبہ کی روایت میں ہے کہ انہوں نے پوچھا: کیا یہ حرام ہے؟ رسول اللہ صلی اللہ علیہ وسلم نے فرمایا: ”نہیں“، جبکہ حماد کی روایت میں ہے کہ انہوں نے عرض کیا: یا رسول اللہ! آپ نے مجھے وہ کھانا واپس بھیج دیا جو آپ نے تناول نہیں فرمایا، تو آپ صلی اللہ علیہ وسلم نے فرمایا: ”بے شک تم میری مثل نہیں ہو، میرے پاس فرشتہ آتا ہے (جسے لہسن کی بو ناگوار گزرتی ہے)۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6051]

سیدنا ابو ایوب رضی اللہ عنہ سے روایت ہے، انہوں نے کہا: جب رسول اللہ صلی اللہ علیہ وسلم میرے ہاں تشریف لائے تو میں نے عرض کیا: (یا رسول اللہ!) میرے ماں باپ آپ پر قربان ہوں، میں اسے سخت ناپسند کرتا ہوں کہ میں اوپر والی منزل پر رہوں اور آپ میرے نیچے منزل پر ہوں، رسول اللہ صلی اللہ علیہ وسلم نے فرمایا: ”میرے لیے نیچے رہنا ہی زیادہ سہولت کا باعث ہے کیونکہ لوگ مجھ سے ملنے آتے رہتے ہیں“، وہ کہتے ہیں کہ ایک بار ہمارا پانی کا ایک گھڑا ٹوٹ گیا اور اس کا سارا پانی بہہ گیا، پس میں اور ام ایوب اپنی اس چادر کے ساتھ پانی خشک کرنے لگے جس کے سوا ہمارا کوئی اوڑھنا نہ تھا، ہم اس ڈر سے ایسا کر رہے تھے کہ کہیں پانی کا کوئی قطرہ نیچے رسول اللہ صلی اللہ علیہ وسلم تک پہنچ کر انہیں اذیت نہ پہنچا دے۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6052]