مطرف بن عبداللہ سے روایت ہے کہ سیدنا عمران بن حصین رضی اللہ عنہ نے فرمایا: ”اے مطرف! جان لو کہ فرشتے مجھ پر میرے سرہانے، گھر کے پاس اور حجرے کے دروازے کے پاس سلام بھیجا کرتے تھے، پھر جب میں نے (علاج کے لیے بدن کو) داغ لگوایا تو وہ سلسلہ ختم ہو گیا،“ پھر جب ان کا زخم مندمل ہو گیا تو انہوں نے کہا: ”اے مطرف! جان لو کہ جو کیفیت مجھ پر پہلے طاری تھی وہ دوبارہ لوٹ آئی ہے، میرے مرنے تک اس بات کو مجھ سے پوشیدہ رکھنا۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6107]

سیدنا عمران بن حصین رضی اللہ عنہ سے روایت ہے کہ انہوں نے فرمایا: ”جب سے میں نے رسول اللہ صلی اللہ علیہ وسلم کی بیعت کی ہے، میں نے اپنے دائیں ہاتھ سے اپنی شرمگاہ کو کبھی نہیں چھوا۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6108]

واقع بن سحبان سے روایت ہے کہ ایک شخص سیدنا عمران بن حصین رضی اللہ عنہ کے پاس آیا جبکہ وہ مسجد میں تشریف فرما تھے، تو اس نے سوال کیا کہ اس شخص کے بارے میں کیا حکم ہے جس نے اپنی بیوی کو ایک ہی مجلس میں تین طلاقیں دے دیں؟ انہوں نے جواب دیا: ”اس پر گناہ لازم ہو گیا اور اس کی بیوی اس پر (مغلظہ طلاق کی وجہ سے) حرام ہو گئی۔“ وہ شخص وہاں سے چلا گیا اور اس نے (تنقید کی غرض سے) اس بات کا تذکرہ سیدنا ابو موسیٰ اشعری رضی اللہ عنہ سے کیا، تو سیدنا ابو موسیٰ رضی اللہ عنہ نے فرمایا: ”اللہ تعالیٰ ہمارے درمیان ابو نُجید (سیدنا عمران بن حصین) جیسے صاحبِ بصیرت لوگوں کی کثرت فرمائے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6109]