ابراہیم بن محمد بن عبدالعزیز بن عمر بن عبدالرحمن بن عوف اپنے والد سے، وہ ان کے دادا سے روایت کرتے ہیں کہ سیدنا عبدالرحمن بن ابی بکر رضی اللہ عنہ نے سیدنا معاویہ کی بیعت سے انکار کر دیا تھا، تو سیدنا معاویہ رضی اللہ عنہ نے سیدنا عبدالرحمن بن ابی بکر صدیق رضی اللہ عنہما کی جانب ایک لاکھ درہم ہدیہ بھیجا۔ سیدنا عبدالرحمن بن ابی بکر رضی اللہ عنہما نے وہ دراہم قبول کرنے سے انکار کر دیا اور واپس بھیج دئیے۔ اور فرمایا: میں دنیا کے بدلے دین کو نہیں بیچ سکتا۔ پھر آپ مکہ کی جانب نکل گئے اور راستے میں فوت ہو گئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6128]

سیدنا عبدالرحمن ابن ابی بکر رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: میرے پاس قلم دوات لاؤ، میں تمہیں تحریر لکھ دوں تاکہ تم کبھی بھی گمراہ نہ ہو، پھر رسول اللہ صلی اللہ علیہ وسلم نے ہماری جانب پشت کر لی، کچھ دیر بعد آپ نے اپنا چہرہ ہماری طرف کیا اور فرمایا: اللہ تعالیٰ اور مومنین انکار کر رہے ہیں سوائے ابوبکر کے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6129]