سیدنا ابن عباس رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”اسلام میں زناکاری کا کوئی تصور اور مقام نہیں، جس کسی نے ایامِ جاہلیت میں یہ عملِ بد کیا ہو تو بچہ اس کے عصبہ ہی سے ملحق ہو گا۔ اور جو کوئی نکاحِ صحیح کے بغیر کسی بچے کا دعویٰ کرے (زنا کی وجہ سے) تو نہ وہ باپ اس بچے کا وارث ہو گا اور نہ وہ بیٹا اس باپ کا۔“ [سنن ابي داود/كتاب تفريع أبواب الطلاق /حدیث: 2264]

جناب عمرو بن شعیب اپنے والد (شعیب) سے اور وہ اپنے دادا سیدنا عبداللہ بن عمرو رضی اللہ عنہ سے روایت کرتے ہیں کہ انہوں نے کہا: نبی کریم صلی اللہ علیہ وسلم نے فیصلہ فرمایا کہ ”ایسا بچہ جس کے متعلق باپ کی وفات کے بعد دعویٰ کیا گیا ہو، جبکہ باپ اپنی زندگی میں اس کا مدعی رہا ہو اور بعد میں اس کے وارثوں نے بھی اس کا دعویٰ کیا ہو، تو اگر بچہ ایسی لونڈی کے بطن سے ہو کہ مباشرت کے روز وہ اس مدعی کی ملکیت میں تھی، تو یہ بچہ اس کے ساتھ ملحق ہو گا جس کے ساتھ الحاق کا دعویٰ کیا گیا ہے۔ اور مالِ وراثت جو الحاق سے پہلے تقسیم ہو چکا، اس میں اس بچے کا حق نہ ہو گا مگر باقی ماندہ میں اپنا حصہ پائے گا۔ لیکن اگر اس باپ نے، جس کی طرف لاحق کیے جانے کا دعویٰ کیا جا رہا ہو، اس کا انکار کیا ہو تو اس کے ساتھ ملحق نہ ہو گا۔ اور اگر بچہ کسی ایسی لونڈی سے ہو جو اس مدعی باپ کی ملکیت نہ تھی یا کسی آزاد عورت سے ہو جس کے ساتھ اس نے زنا کیا تھا، تو بھی اس کے ساتھ اس بچے کو ملحق نہ کیا جائے گا اور نہ وارث ہو گا، اگرچہ جس کی طرف اس کی نسبت کی جاتی ہے وہ اس کا مدعی بھی ہو۔ ایسا بچہ «وَلَدُ الزِّنَا» ”ولد الزنا“ ہو گا، کسی آزاد عورت سے ہو یا لونڈی سے۔“ [سنن ابي داود/كتاب تفريع أبواب الطلاق /حدیث: 2265]

محمد بن راشد رحمہ اللہ نے اپنی سند سے اس مذکورہ حدیث کے ہم معنی بیان کیا اور مزید کہا: ”یہ ولد الزنا ہو گا اور اپنی ماں کے اہل کی ملکیت ہو گا خواہ کوئی ہوں، آزاد عورت ہو یا کوئی لونڈی۔ اور یہ فیصلے اسلام کے اولین دور میں ہوئے تھے۔ اور جو مال قبل از اسلام تقسیم ہو چکے، وہ ہو چکے۔“ [سنن ابي داود/كتاب تفريع أبواب الطلاق /حدیث: 2266]