ام المؤمنین سیدہ عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم ایک دن بڑے خوش خوش میرے ہاں تشریف لائے۔ عثمان بن ابی شیبہ کے الفاظ ہیں کہ آپ صلی اللہ علیہ وسلم کے چہرے کے خطوط چمک رہے تھے۔ آپ صلی اللہ علیہ وسلم نے فرمایا: ”عائشہ! کیا کچھ معلوم ہوا کہ مجزز مدلجی نے زید اور اسامہ کو دیکھا جبکہ وہ دونوں ایک چادر سے اپنے سر ڈھانپے (لیٹے) ہوئے تھے اور ان کے پاؤں ننگے تھے تو مجزز نے کہا: «إِنَّ هَذِهِ الْأَقْدَامَ بَعْضُهَا مِنْ بَعْضٍ» ”بلاشبہ یہ قدم ایک دوسرے سے ہیں۔ (باپ بیٹے کے ہیں)““ امام ابوداؤد رحمہ اللہ نے کہا: ”سیدنا اسامہ سیاہ رنگ کے تھے اور سیدنا زید سفید رنگ کے۔“ [سنن ابي داود/كتاب تفريع أبواب الطلاق /حدیث: 2267]

ابن شہاب نے اپنی سند سے مذکورہ بالا کے ہم معنی بیان کیا، سیدہ عائشہ رضی اللہ عنہا نے کہا: ”آپ صلی اللہ علیہ وسلم بڑے خوش خوش میرے پاس تشریف لائے، آپ صلی اللہ علیہ وسلم کے چہرے کی دھاریاں چمک رہی تھیں۔“ امام ابوداؤد رحمہ اللہ فرماتے ہیں کہ ”اسامہ سیاہ اور زید رضی اللہ عنہ سفید رنگ کے تھے۔“ امام ابوداؤد رحمہ اللہ فرماتے ہیں: ” «أَسَارِيرُ وَجْهِهِ» کا لفظ ابن عیینہ نے یاد نہیں رکھا۔“ امام ابوداؤد رحمہ اللہ فرماتے ہیں: ” «أَسَارِيرُ وَجْهِهِ» کے الفاظ ابن عیینہ کی تدلیس ہے، جو کہ انہوں نے زہری سے نہیں سنے بلکہ کسی اور سے سنے ہیں، یہ الفاظ لیث وغیرہ کی روایت میں آئے ہیں۔“ امام ابوداؤد رحمہ اللہ نے کہا: ”احمد بن صالح کہا کرتے تھے کہ سیدنا اسامہ رضی اللہ عنہ انتہائی کالے رنگ کے تھے جیسے کہ تارکول ہو اور زید رضی اللہ عنہ سفید رنگ کے تھے جیسے کہ روئی۔“ [سنن ابي داود/كتاب تفريع أبواب الطلاق /حدیث: 2268]