عبدالرحمن بن عثمان بن زیاد اشجعی اپنے والد سے روایت کرتے ہیں کہ سیدنا معقل بن سنان اشجعی رضی اللہ عنہ نبی کریم صلی اللہ علیہ وسلم کے صحابی تھے اور فتح مکہ کے دن اپنی قوم کا جھنڈا اٹھائے ہوئے تھے، وہ اس وقت ایک ترو تازہ نوجوان تھے، وہ اس کے بعد طویل عرصہ حیات رہے یہاں تک کہ ولید بن عتبہ بن ابوسفیان (جو مدینہ کے گورنر تھے) نے انہیں کسی کام سے بھیجا، وہاں معقل بن سنان اور مسلم بن عقبہ (جو مسرف کے نام سے مشہور ہے) کا سامنا ہوا، معقل نے مسرف کے ساتھ گفتگو کے دوران یزید بن معاویہ کا ذکر کرتے ہوئے کہا: ”میں اس شخص کی بیعت کے لیے ناگواری کے ساتھ نکلا تھا، اور اس کے پاس جانا محض قضائے الٰہی اور تقدیر کا فیصلہ تھا، وہ شخص شرابی ہے، حرمات کی بے حرمتی کرتا ہے،“ پھر انہوں نے ان کی مذمت کی اور ان کی چند بری خصلتیں بیان کیں، پھر مسرف سے کہا: ”میرا جی چاہا کہ یہ بات میں تمہارے پاس امانت رکھ دوں،“ مسرف نے کہا: ”اللہ کی قسم! میں آج کے دن تو یہ بات امیر المومنین کو نہیں بتاؤں گا لیکن اللہ کے حضور میرا یہ عہد و میثاق ہے کہ اگر کبھی مجھے تم پر قدرت حاصل ہو گئی، تو میں تمہارا سر قلم کر دوں گا۔“ پھر جب مسرف مدینہ آیا اور ایامِ حرہ میں وہاں قتل و غارت کی، تو معقل بن سنان اس وقت مہاجرین کے سالار تھے، انہیں قیدی بنا کر مسرف کے پاس لایا گیا، اس نے پوچھا: ”اے معقل بن سنان! کیا تمہیں پیاس لگی ہے؟“ انہوں نے کہا: ”جی ہاں، اللہ، امیر کی اصلاح فرمائے،“ اس نے خادموں سے کہا: ”ان کے لیے بادام کا شربت تیار کرو،“ جب انہوں نے شربت پلا دیا تو اس نے پوچھا: ”کیا تم نے شربت پی لیا اور سیراب ہو گئے؟“ انہوں نے کہا: ”جی ہاں،“ تو اس نے کہا: ”اللہ کی قسم! تم اس سے لطف اندوز نہیں ہو سکو گے، اے مفر ج! اے نوفل بن مساحق! اٹھو اور اس کی گردن اڑا دو،“ چنانچہ اس نے اٹھ کر انہیں قید کی حالت میں قتل کر دیا، واقعہ حرہ ذوالحجہ سن 63 ہجری میں پیش آیا تھا۔ تب انصار کے ایک شاعر نے یہ اشعار کہے: ”خبردار! وہ انصار اپنے سرداروں کا ماتم کر رہے ہیں، اور قبیلہ اشجع معقل بن سنان کا سوگ منا رہا ہے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6349]

ابو محمد اشعث بن قیس کندی جن کا تعلق بنو حارث بن معاویہ سے تھا، ان کی وفات کوفہ میں ہوئی، ان کی وفات کے وقت سیدنا حسن بن علی رضی اللہ عنہما سیدنا معاویہ رضی اللہ عنہ سے صلح کے بعد وہیں موجود تھے، چنانچہ سیدنا حسن بن علی رضی اللہ عنہما نے ان کی نمازِ جنازہ پڑھائی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6350]

سیدنا حفص بن جابر بیان کرتے ہیں کہ جب سیدنا اشعث بن قیس رضی اللہ عنہ کی وفات ہوئی تو سیدنا حسن بن علی رضی اللہ عنہما نے فرمایا: ”جب تم انہیں غسل دے لو تو انہیں (کفن پہنا کر) حرکت نہ دینا یہاں تک کہ میں آ جاؤں،“ راوی کہتے ہیں کہ جب وہ تشریف لائے تو انہوں نے خوشبو منگوائی اور اس سے ان کے ہاتھوں، چہرے اور پاؤں کا وضو کرایا اور پھر فرمایا: ”اب انہیں کفن میں لپیٹ دو۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6351]