اخنس بن خلیفہ ضبی بیان کرتے ہیں کہ کعب احبار نے سیدنا عبداللہ بن عمرو رضی اللہ عنہما کو لوگوں کو فتاویٰ دیتے ہوئے دیکھا تو پوچھا کہ یہ کون ہیں؟ لوگوں نے بتایا کہ یہ عبداللہ بن عمرو بن العاص ہیں، تو کعب نے اپنے ساتھیوں میں سے ایک شخص کو ان کی طرف بھیجا اور کہا کہ ان سے جا کر کہو: اے عبداللہ بن عمرو! اللہ پر جھوٹ مت باندھو ورنہ وہ تمہیں عذاب کے ذریعے ہلاک کر دے گا، کیونکہ ﴿وَقَدْ خَابَ مَنِ افْتَرَى﴾ [سورة طه: 61] ”وہ شخص نامراد رہا جس نے بہتان باندھا“، وہ شخص ان کے پاس آیا اور یہی بات کہی تو ابن عمرو رضی اللہ عنہما نے فرمایا: کعب نے سچ کہا ہے، وہ شخص واقعی نامراد رہا جس نے بہتان باندھا، اور وہ (یہ سن کر) ذرا بھی ناراض نہ ہوئے، پھر کعب نے دوبارہ اسی شخص کو ان کے پاس بھیجا اور کہا: ان سے پوچھو کہ حشر کیا ہے؟ اور مسلمانوں کی روحیں کہاں جمع ہوتی ہیں؟ اور مشرکین کی روحیں کہاں جمع ہوتی ہیں؟ وہ شخص آیا اور سوال کیا تو ابن عمرو رضی اللہ عنہما نے فرمایا: جہاں تک مسلمانوں کی روحوں کا تعلق ہے تو وہ اریحا میں جمع ہوتی ہیں، اور مشرکین کی روحیں صنعاء میں جمع ہوتی ہیں، اور رہا حشر کا آغاز تو وہ ایک ایسی آگ ہے جو لوگوں کو ہانک کر لے جائے گی، وہ آگ انہیں رات کو نظر آئے گی اور دن کو دکھائی نہیں دے گی، کعب کا قاصد واپس گیا اور انہیں خبر دی تو کعب نے کہا: انہوں نے سچ کہا، یہ بہت بڑے عالم ہیں، پس تم ان سے سوال کیا کرو۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6377]