محمد بن عمر بیان کرتے ہیں کہ اسماء بن حارثہ بن سعید بن عبداللہ بن غیاث کا نسب بنو حارثہ بن مالک بن افصی تک پہنچتا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6378]

سیدنا اسماء بن حارثہ اسلمی رضی اللہ عنہ بیان کرتے ہیں کہ میں یومِ عاشورہ کے دن نبی کریم صلی اللہ علیہ وسلم کی خدمت میں حاضر ہوا تو آپ صلی اللہ علیہ وسلم نے پوچھا: ”اے اسماء! کیا تم نے آج روزہ رکھا ہے؟“ میں نے عرض کیا: جی نہیں، آپ صلی اللہ علیہ وسلم نے فرمایا: ”تو پھر روزہ رکھ لو،“ میں نے عرض کیا: اے اللہ کے رسول! میں تو دوپہر کا کھانا کھا چکا ہوں، آپ صلی اللہ علیہ وسلم نے فرمایا: ”جو دن باقی رہ گیا ہے اس کا روزہ رکھ لو اور اپنی قوم کو بھی روزہ رکھنے کا حکم دو،“ اسماء رضی اللہ عنہ کہتے ہیں کہ میں نے اپنے جوتے ہاتھ میں لیے اور تیزی سے روانہ ہوا یہاں تک کہ اپنی قوم کے پاس پہنچا اور کہا کہ اللہ کے نبی صلی اللہ علیہ وسلم تمہیں روزہ رکھنے کا حکم دیتے ہیں، انہوں نے کہا: ہم تو کھانا کھا چکے ہیں، میں نے کہا کہ آپ صلی اللہ علیہ وسلم نے تمہیں بقیہ دن کا روزہ رکھنے کا حکم دیا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6379]

ابراہیم بن منذر حزامی بیان کرتے ہیں کہ سیدنا اسماء بن حارثہ رضی اللہ عنہ کی وفات سن 66 ہجری میں ہوئی جبکہ اس وقت ان کی عمر 80 برس تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6380]