سیدنا ہند بن حارثہ رضی اللہ عنہ فرماتے ہیں کہ نبی اکرم صلی اللہ علیہ وسلم نے عاشوراء کے دن انہیں یہ پیغام دے کر بھیجا کہ جا کر اپنی قوم کو کہہ دو کہ آج کا دن روزہ رکھیں۔ انہوں نے عرض کی: یا رسول اللہ صلی اللہ علیہ وسلم اگر ان لوگوں نے کچھ کھا، پی لیا ہو تو کیا حکم ہے؟ آپ صلی اللہ علیہ وسلم نے فرمایا: اگر کھا، پی بھی لیا ہو، تب بھی وہ دن کے آخری حصے تک روزہ رکھیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6384]

محمد بن عمر فرماتے ہیں کہ سلیمان بن صرد بن جون ابن ابی جون رضی اللہ عنہ ہی عبدالعزیٰ بن منقذ بن ربیعہ ہیں۔ ان کی کنیت ” ابومطرف “ تھی۔ انہوں نے اسلام قبول کیا، رسول اللہ صلی اللہ علیہ وسلم کی صحبت بابرکت حاصل کی۔ ان کا نام ” یسار “ تھا۔ جب انہوں نے اسلام قبول کیا تو رسول اللہ صلی اللہ علیہ وسلم نے ان کا نام ” سلیمان “ رکھ دیا۔ آپ اپنی قوم کے بہت زیرک اور معتبر آدمی تھے۔ جب مسلمان کوفہ میں گئے تو یہ بھی وہاں گئے۔ اور امیرالمومنین سیدنا علی رضی اللہ عنہ کے ہمراہ جنگ صفین میں شریک ہوئے۔ پھر یہ چار ہزار افواج کا لشکر لے کر سیدنا حسین بن علی رضی اللہ عنہ کے قتل کا بدلہ لینے کے لئے نکلے، اسی واقعہ میں سیدنا سلیمان بن صرد رضی اللہ عنہ شہید کر دیئے گئے۔ ان کا سر مروان کے دربار میں بھیج دیا گیا۔ جس دن سیدنا سلیمان رضی اللہ عنہ کو شہید کیا گیا اس دن ان کی عمر 93 برس تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6385]

محمد بن اسحاق کہتے ہیں: میں نے محمد بن اسماعیل بخاری کو یہ فرماتے ہوئے سنا ہے کہ مختار بن ابی عبید نے سیدنا سلیمان بن صرد رضی اللہ عنہ کو شہید کیا تھا۔ جبکہ اس سے پہلے سیدنا سلیمان بن صرد، عبیداللہ بن زیاد کو قتل کر چکے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6386]