عبداللہ بن ابوبکر بن محمد بن عمرو بن حزم بیان کرتے ہیں کہ ہم ان کے پاس بیٹھے تھے کہ رسول اللہ صلی اللہ علیہ وسلم کی مدینہ تشریف آوری کے بعد انصار کے ہاں پیدا ہونے والے پہلے بچے کا ذکر ہوا، تو انہوں نے بتایا کہ وہ نعمان بن بشیر ہیں جو رسول اللہ صلی اللہ علیہ وسلم کی مدینہ آمد کے ایک سال اور چند دن بعد یا ایک سال سے کچھ کم عرصے میں پیدا ہوئے تھے، پھر لوگوں نے عبداللہ بن ابی طلحہ کا ذکر کیا تو انہوں نے کہا کہ سیدہ ام سلیم رضی اللہ عنہا غزوہ حنین کے دن ان سے حاملہ تھیں اور ان کی پیدائش مدینہ واپسی کے بعد ہوئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6390]

ابو مسہر بیان کرتے ہیں کہ سیدنا نعمان بن بشیر رضی اللہ عنہ کو مقامِ سلمیہ اور حمص کے درمیان دھوکے سے قتل کر دیا گیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6391]

علی بن محمد مدائنی اور دیگر بیان کرتے ہیں کہ جب مروان بن حکم کی خلافت میں ذوالحجہ سن 64 ہجری کے وسط میں مقامِ مرج راہط پر ضحاک بن قیس قتل ہوئے، تو نعمان بن بشیر حمص سے بھاگنا چاہتے تھے جہاں وہ گورنر تھے، انہوں نے (بنو امیہ کی) مخالفت کی تھی اور ابن زبیر کی بیعت کی دعوت دی تھی، چنانچہ اہل حمص نے انہیں تلاش کر کے قتل کر دیا اور ان کا سر کاٹ لیا۔
نعمان بن بشیر کا رسول اللہ صلی اللہ علیہ وسلم سے سماع صحیحین کی روایات سے ثابت ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6392]