خلیفہ بن خیاط بیان کرتے ہیں کہ ابو واقد لیثی کا نام حارث بن عوف بن اسید بن جابر بن عبد مناہ بن شجع بن عامر بن لیث ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6394]

محمد بن عمر بیان کرتے ہیں کہ ابو واقد حارث بن مالک ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6395]

سعید بن کثیر بن عفیر بیان کرتے ہیں کہ ابو واقد لیثی کا نام حارث بن عوف بن حارث بن اسید بن جابر بن عویرہ بن عبد مناہ بن شجع بن عامر ہے، وہ قدیم الاسلام صحابی تھے، فتح مکہ کے دن بنو لیث، ضمرہ اور بنو سعد بن بکر کا جھنڈا ان کے پاس تھا، وہ رسول اللہ صلی اللہ علیہ وسلم کے بعد ایک طویل مدت تک زندہ رہے پھر مکہ چلے گئے اور ایک سال وہاں قیام کے بعد وہیں وفات پائی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6396]

نافع بن سرجس بیان کرتے ہیں کہ ہم نے ابو واقد لیثی کی ان کے مرضِ الموت میں عیادت کی، جب ان کی وفات ہوئی تو ہم نے انہیں مکہ میں فخ کے مقام پر مہاجرین کے قبرستان میں دفن کیا، اسے مہاجرین کا قبرستان اس لیے کہا جاتا ہے کیونکہ وہاں ان لوگوں کو دفن کیا جاتا تھا جنہوں نے مدینہ کی طرف ہجرت کی تھی اور پھر حج یا قیام کی غرض سے مکہ آئے اور وہیں وفات پا گئے، ان میں ابو واقد لیثی اور عبداللہ بن عمر وغیرہ شامل ہیں، ابو واقد لیثی کی وفات سن 68 ہجری میں ہوئی جبکہ ان کی عمر 85 برس تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6397]

سیدنا ابو واقد لیثی رضی اللہ عنہ بیان کرتے ہیں کہ میں رسول اللہ صلی اللہ علیہ وسلم کے پاس اس طرح بیٹھا تھا کہ میرا گھٹنا آپ صلی اللہ علیہ وسلم کے گھٹنوں سے مس ہو رہا تھا، اتنے میں ایک آنے والا آیا اور اس نے آپ صلی اللہ علیہ وسلم کے کان میں کوئی بات کہی، جس سے رسول اللہ صلی اللہ علیہ وسلم کے چہرہ مبارک کا رنگ بدل گیا اور غصے کی وجہ سے پیشانی کی رگیں ابھر آئیں، پھر آپ صلی اللہ علیہ وسلم نے فرمایا: ”یہ عامر بن طفیل کا قاصد ہے جو مجھے اور میرے پاس پناہ لینے والوں کو دھمکیاں دے رہا ہے، حالانکہ اللہ عزوجل نے میرے لیے اسماعیل کی اولاد یعنی قبیلہ قیلہ کے دونوں بیٹوں (انصار) کے ذریعے اسے کافی کر دیا ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6398]