مجاہد بن جبر ابوالحجاج سے روایت ہے کہ سیدنا علی بن ابی طالب رضی اللہ عنہ پر اللہ تعالیٰ کے احسانات اور ان کے لیے خیر کے ارادے کی ایک صورت یہ بھی تھی کہ قریش سخت قحط کا شکار ہوئے اور ابوطالب عیال دار (زیادہ بچوں والے) تھے، تو رسول اللہ صلی اللہ علیہ وسلم نے اپنے چچا عباس رضی اللہ عنہ سے فرمایا (جو بنو ہاشم میں سب سے زیادہ مالدار تھے): ”اے ابوالفضل! آپ کے بھائی ابوطالب کے اہل و عیال زیادہ ہیں اور لوگوں پر یہ سخت وقت آ پڑا ہے جو آپ دیکھ رہے ہیں، پس آئیے ان کے پاس چلیں اور ان کے عیال کا بوجھ بانٹیں، میں ان کے بیٹوں میں سے ایک کو اپنے پاس رکھ لیتا ہوں اور ایک کو آپ رکھ لیں، ہم ان کی کفالت کر لیں گے۔“ سیدنا عباس رضی اللہ عنہ نے حامی بھر لی، وہ دونوں ابوطالب کے پاس آئے اور کہا: ”ہم چاہتے ہیں کہ آپ کے اہل خانہ کا بوجھ ہلکا کریں یہاں تک کہ لوگوں کی یہ مشکل ٹل جائے۔“ ابوطالب نے ان سے کہا: ”اگر تم میرے پاس عقیل کو رہنے دو تو پھر جو چاہو کرو۔“ چنانچہ رسول اللہ صلی اللہ علیہ وسلم نے سیدنا علی رضی اللہ عنہ کو اپنے ساتھ ملا لیا اور سیدنا عباس رضی اللہ عنہ نے جعفر کو اپنے ساتھ لے لیا، پس سیدنا علی رضی اللہ عنہ مسلسل رسول اللہ صلی اللہ علیہ وسلم کے ساتھ رہے یہاں تک کہ اللہ تعالیٰ نے آپ صلی اللہ علیہ وسلم کو نبی بنا کر بھیجا تو انہوں نے آپ کی اتباع اور تصدیق کی، اور سیدنا عباس نے جعفر کو اپنے پاس رکھا اور وہ مسلسل ان کے ساتھ رہے یہاں تک کہ وہ اسلام لائے اور ان سے مستغنی (آزاد) ہو گئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6606]