عروہ بن زبیر سے روایت ہے کہ ابو لبابة بشیر بن عبدالمنذر اور حارث بن حاطب رسول اللہ صلی اللہ علیہ وسلم کے ساتھ بدر کی طرف روانہ ہوئے تھے مگر آپ صلی اللہ علیہ وسلم نے ان دونوں کو (راستے سے) واپس بھیج دیا، اور ابولبابہ رضی اللہ عنہ کو مدینہ پر امیر مقرر فرمایا، اور ان دونوں کے لیے اہل بدر کے ساتھ (مالِ غنیمت میں سے) باقاعدہ حصہ مقرر فرمایا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6802]

سیدنا ابولبابہ رضی اللہ عنہ کے پوتے حسین بن سائب اپنے والد (سائب) سے اور وہ اپنے والد (سیدنا ابولبابہ) سے روایت کرتے ہیں کہ جب اللہ تعالیٰ نے ابولبابہ کی توبہ قبول فرما لی تو انہوں نے عرض کیا: اے اللہ کے رسول! میں اپنی اس قوم کا گھر چھوڑ دوں گا جہاں مجھ سے گناہ سرزد ہوا تھا اور اپنا سارا مال اللہ اور اس کے رسول کے لیے صدقہ کر دوں گا، تو رسول اللہ صلی اللہ علیہ وسلم نے فرمایا: ”اے ابولبابہ! تمہاری طرف سے تہائی مال (صدقہ کرنا) کافی ہے۔“ چنانچہ میں نے اپنے مال کا تہائی حصہ صدقہ کر دیا۔
یہ حدیث صحیحین کے معیار پر ہے، اور میں نے اسے یہاں اس لیے نقل کیا ہے کیونکہ مجھے رسول اللہ صلی اللہ علیہ وسلم سے سیدنا ابولبابہ رضی اللہ عنہ کی اس کے علاوہ کوئی اور مسند حدیث نہیں ملی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6803]